Tura: North Garo Hills-oni Uttarakhand-ni sko-tong songjinma Dehradun-o poraigipa chadambe chatro saksa adita sal-rangna skango motor-bike sale re·angmitingo gari bolsa chattinggrike misil-gipa rama a·sel ong·e uni janggiko gimataha.
Koboro man·ani gita a·sel ong·e sianggipa Cherikam D Sangma ong·a-chim ua Dehradun-o ICFAI-o poraiengachim ua uni ripeng baksa motor-bike-o re·angengachim unon uni bike gari bolsa baksa chattinggrike a·sel ong·aha indake ua bilongen saknaa man·aha.
Uko Dehradun Mahanta Indresh Hospital-ni ICU-o donachim aro ja·mano Delhini AIIMS Trauma Centre-ona ra·jitangaha uno sanengmitngo uni saknaa man·a bilonganichi November 10 mija Suk-robar-o siangaha.
All Dehradun Achik Students Association (ADASA) president, Teseng Ch Sangma aro Chaplain Raphun G Momin-ni aganani gita, uamang aro chatroska gipinrang uandake Chief Minister Conrad Sangma sana-bana gita New Delhi-AIIMS-o saknaa man·gipa Cherikam-ko tangka-paisani gita dakchakna jotton ka·ahachim indiba ua sanmitingon siangaha.
“Delhi A’chik Association-ni palo chinga pilak kamrango uni ka·sachaka-nina aro dakchakanina Conrad Sangma-ko mittelna skang. Chinga chingni Meghalaya House Additional Resident of Commissioner, Florida Boro-ko, Chaplain Fredie Arengh aro Special Police unit Northeast Regional (SPUNER) team SI Justfil Momin, Delhi Achik Christian Fellowship, MLP Employees aro Officer-rang uamangkoba dingtang-mancha mittelna ska je-mangan Cherikam-ko sanengmitingo uni nok-dangni Dehradun-ona re·bana tikkitrangko book ka·na tangka-paisani gita dakchakaha,” DAA aganaha.
DAA, nokdangni man-derangna sildoreng tik-kitrangko ra·e on·anina Tura MP, Agatha Sangma-koba mittelaha.
“Chinga sakanti-sak-prakkon jemangan pilak nangchongmota kam-rangko matchotatna ua salrango chingko aro sianggipani nokdangna dakchakaha pilakkon mittelna ska,” DAA president, Babarham Sangma aganaha.
