U·IATTIMGIPAONI
SHILLONG: Tura jillao songdongenggipa manderangni china neng·nikaniko namatna gita ma·mong sorkari, Tura Bulk Water Supply Scheme-ko ra·gatna gong kror 100 tangkarangko chamataha.
Iani bidingo kobor ra·timgiparangna talate on·angengon, ia scheme-ko ma·mong sorkari, North East Special Infrastructure Development Scheme (NESIDS)-ni ning·o chame on·ataha aro ian Tura jillao songdongenggipa manderangni china neng·nikaniko namatna man·gnok ine a·dokni PHE Minister Marcuise N Marak parakataha.
“Dongimin pilak niamrangko ja·rikani ja·man ia scheme-ni kamrangko ta·raken a·bachengatna man·na gita tender-ko on·gnok,” ine Marak aganaha.
Tura jillao songdongenggipa manderangna da·o dongenggipa project-rangchi chirangko chu·onga gita on·na man·jaengani gimin mikkangchi iandakgipa project-rangko ra·bana gita ua proposal-ko on·angkugen ineba PHE Minister parakataha.
“Irrigation, Eco-tourism aro uandakgipa pilak kamrangnan cholinagipa tengkiko rikna chinga proposal-ko on·enga. Iandakgipa chi tengkirangko rikanichi wa·al kamani somoirango wa·al kimitgiparangnaba dakchakani ong·gen,” ine Marak aganaha.
Indake ong·engon, New Shillong Township-na chirangko sale on·anio ma·mong sorkarini dakchakanikoba uamang bi·ataha ineba PHE Minister parakataha.
