U·IATTIMGIPAONI
TURA: North Garo Hills a·jani Bolsonggre songo donggipa Animal Husbandry & Veterinary department-ni village centre ICDP-ko chi aro bijoli grisa chalaiengani a·sel ia centre-o kam ka·enggipa manderangsan ong·aigija, uamangni sanenggipa matburingrangnaba nangchakeaniko ra·baenga ine A·chik Holistic Awakening Movement (AHAM) Bajengdoba unit parakatenba, ia veterinary centre-na aro kamko ka·enggipa manderangni dongchakenggipa quarter-rangnaba nanga gita chi aro bijoliko on·china sorkariko didiataha.
AHAM Bajengdoba unit-ni president Kollingwath D Sangma-ni parakatani gitade, uamang Mongolbar salo, Bolsonggre songo donggipa AH & Veterinary department-ni village centre ICDP-ko nina re·angon, ia centre-o ong·enga obostarangko nikbae, iani bidingo songni Nokma baksaba agan-golpogrikbaaha.
“Bolsonggre veterinary quarter-o chi aro bijolirang dongjae kamko ka·enggipa manderang neng·nikanirangko chagrongna nangtokenga ine chinga ma·sibana man·aha. Matburungrangko sanchakgipa biapo chi aro bijolirang dongjaniara kam ka·enggipa manderangna neng·nikanirangko ra·baanisan ong·aigija sanna bananirangko man·enggipa matburingrangnaba nangchakeaniko ra·baenga,” ine Sangma parakataha.
Bolsonggre songo donggipa AH & Veterinary department-ni village centre ICDP-o sak 200-na baten songni manderang pangchakna gita nangtokenga ine janapatengon, ia songni manderangna aro uamangni jila kaanirangko nambate nirok sandina man·na gita ia veterinary quarter-rangna chu·onga gita chi aro bijoliko on·china AHAM Bajengdoba unit, sorkari official-rangko didiataha.