U·IATTIMGIPAONI
SHILLONG: Re·baenggipa 2024 bilsini Lok Sabha election-o Meghalaya a·dokni Trinamool Congress (TMC) susagenma susajawa name ma·sikujaengon, election-o susana gita High Command-oni u·iataniko man·soani ja·mansa candidate-rangko sandina a·bachengatgen ine Sukrobar salo, TMC-ni state president Charles Pyngrope parakataha.
“Lok Sabha election-o susaani bidingo chinga Meghalaya a·dokni in-charge-na u·iatmanaha aro da·o ua High Command-ni dilgiparang baksa chanchirimenba ja·mano chingna u·iatskagen,” ine Pyngrope aganaha.
Pyngrope-ni u·iatani gitade, Lok Sabha election-ni bidingo TMC Meghalaya unit-ni dilgiparang, high command baksa tom·e chanchirimna sienga.
Lok Sabha election-na candidate-rangko seokani gimin janapatengon, “High command-oni chingna u·iataniko man·sokujaskal chinga Lok Sabha election-o susana gita darangkoba mingna ba seokna man·kujawa,” ine TMC-ni state president parakataha.
High command-ni u·iataniko man·soahaon candidate-na dingtangmancha bimingrangko see high command-na watatgen aro ia apsan niamkon Tura Lok Sabha seat-naba ja·rikanggen ineba ua aganaha.
Lok Sabha election-o TMC susagenchimode sako candidate-na krabate nikengachim ine sing·anina aganchakaniko on·angengon, “Chingni nikanio adita sakde dongachim indiba da·o dipet chinga darangkoba mingna sikkujaenga,” ine Pyngrope aganaha.
Batanggimin somoirangode TMC-ni dilgiparang, Meghalaya a·dokni seat damgni, chong·motan Shillong aro Tura Parliamentary seat-rango susagen ine aganmanahachim.
Shillong seat-na TMC-ni state vice president George B Lyngdoh aro Tura seat-na TMC-ni parliamentary party president Mukul Sangma-ko TMC-ni state president Charles Pyngrope mingeba donsomanahachim.
