U·IATTIMGIPAONI
SHILLONG: Da·o gnigipa changna agangrikaniko a·bachengna skang, Hynniewtrep National Liberation Council (HNLC) bobil dolni sorkarina on·gimin niamrangni bidingo a·dok sorkari, Home Affairs Ministry baksa agangrikchengna tik ka·angaha.
HNLC dolni kosako bangki dongenggipa pilak case-rangko kema ka·e ceasefire-na songgigrikanio soi ka·jaskal da·o changgipin agangrikanio bakko ra·na man·jawa ine re·anggipa Sukrobar salosan, HNLC-ni chairman aro commander-in-chief Bobby R Marwein baksana general secretary Sainkupar Nongtraw, sorkarina niamko on·atmanahachim.
Sorkari baksa agangrikani kamrangko nirokna gita HNLC-ni gital vice chairman Teimiki Laloo-na pakwatmanahani gimin HNLC-ni chairman ba general secretary-de sorkari baksa agangrikanio bakko ra·na man·jawa ineba HNLC-ni dilgiparang parakatahachim.
Iani bidingo kobor ra·timgipa manderangna talate on·angskaengon, HNLC-ni on·atgipa niamrangko a·dok sorkari nie, ia niamrangko ra·chakna man·ama man·jawa ja·mano tik ka·anggen ine Home Department-ni official saksa parakataha.
“HNLC-ni on·gipa niamrangara ra·chakna man·gipa ong·ama ong·jawa uko sorkari nichengenga. Iani bidingo Home Affairs Ministry baksaba a·dok sorkari agangrikchengna nanggen indiba HNLC baksa agangrikaniko a·dok sorkari matchotatna nangnikenga,” ine sorkari official aganaha.
Da·o changgipin sorkari baksa agangrikaniode HNLC-ni chubata gadango donggipa dilgiparangkosa re·bae bak ra·echina gita re·anggipa November-ni 14 tarikosan, a·dokni Deputy Chief Minister Prestone Tynsong u·iatahachim.
Tynsong-ni kobor ra·timgiparangni parakatani gitade, HNLC bobil dol baksa sorkari, changsasan agangrikna man·engkua aro ua chang agangrikgiparangba HNLC bobil dolni chubata gadango donggipa dilgiparangde ong·jachim.
Tynsong-ni parakatani gitade, da·o changgipin agangrikaninaba ma·mong aro a·dok sorkarirang, HNLC bobil dolni dilgiparangko senge dongengachim.
Ia bilsini June jao skanggipa changna sorkari baksa agangrikanio, HNLC-ni dilgiparang, an·tangtangni kosako donggipa case-rangko kema watchina bi·ahachim aro sorkariba uamangni case-rangko kema ka·na ku·rachakahachim.
HNLC bobil dolna ku·baltitimgipani kamko ka·enggipa Sadon Blah-ni parakatani gitade, dingtang dingtang a·jarango police-rang, HNLC bobil dolni dilgiparangni kosako baditaba ming case-rangko ka·ahachim.
