U·IATTIMGIPAONI
SHILLONG: Shillong songjinmao, skul busrangko chalaienggipa Sustainable Transport & Efficient Mobility Society (STEMS)-na dingtangmancha award-ko man·ahaoba Shillong songjinmao, manderangko salruragipa garirangni a·sel neng·nikanirangko chagrongna nangtokkuenga.
Kobor on·timgiparangni u·iatani gitade, ia sal somoirango bang·bata manderangan Shillong airport-oni songrena a·bachengengahaoba aro gipin biaprangoni re·baenggipa manderangba sildoreng gita Shillong airport-on ong·ontokengoba da·onan sorkarini gita bus garirangko wata dongkujaengani a·sel manderang, an·tangtangsa taxi-rangko ra·na nange neng·nikanirangko chagrongna nangtokenga.
Gipin biaprangoni Meghalaya a·dokona sildorengrango re·baenggipa manderang pangnan Shillong airport-on ong·ontokengachim indiba da·onan sorkarini bus garirang dongkujae, airport-ona sokbaani ja·man manderang, Shillong-ona sokbana gita gong 500-mangko taxi garina koros ka·na nangkuenga ine kobor on·aha.
Shillong airport-oni Shillong songjinmaona bus garirangko ta·raken on·china gita airport-ni official-rangba sorkarina u·iataniko on·manahachim indiba da·alonan bus garirangko on·kujaengani a·sel gipin biaprangoni songrebaenggipa manderang neng·nikanirangko chagrongna nangtokenga ine kobor on·timgiparang parakataha.
Mitam manderangni parakatani gitade, skul bus-rangko chalaienggipa STEMS-ni mitam bus-rangsan skulrango poraienggipa chatro chatrirangko salruraenga aro mitamrangkode ISBT-osa indin donaiengachim indiba Shillong airport-onade da·onan bus garirangko sorkari on·skakujaenga.
Songre songgabatgipa mitam manderangni aganani gitade, Guwahati, Kolkata aro New Delhi airport-rangoba pangnan manderangko salrurana gita sorkarini bus garirangko donrongachim indiba Meghalaya a·dokode da·onan songre songgabatgipa manderangko salrurana gita airport-o sorkarini bus garirangko donkujaenga.
 |
ReplyForward
|
