U·IATTIMGIPAONI
TURA: North Eastern Hill University (NEHU) Tura Campus-ni ning·o donggipa Meghalaya Incubation Centre aro Agribusiness Management & Food Technology Department, Bristibar salo, Guwahati-ni APEDA Regional Office baksa nangrime, International Cashew Day-ko maniangaha.
Ia program-ko NEHU-ni Vice Chancellor Prof PS Shukla a·bachengate on·angaha aro program-o NEHU Tura Campus-ni Campus Director Prof Sujata Gurudev, Guwahati ICAR-ATARI-ni Director Dr G Kadirvel, NEHU Shillong-ni Dean, SEMI, Prof G Singaiah aro gipin official-rangba dongpae bak ra·angtokaha.
Ia program-ko ong·atanio NEHU-ni Vice Chancellor Prof PS Shukla, jinmana aganprakangengon, ia International Cashew Day-ko manidilahani gimin NEHU Tura Campus-ni Incubation Centre-ko mittelpilangenba, iandakgipa program-rangko ong·atanio ua pilak nanga dakchakanirangko on·anggen ine ku·rachakaniko on·angaha.
Ia International Cashew Day-ko maniani bak gita dingtangmancha Cashew Nut Mela-koba ong·atangaha aro ia mela-o cashew-oniko tarigimin ma·manti cha·anirangko Food Technology Department-ni chatro chatrirang mesokangaha.
