U·IATTIMGIPAONI
SHILLONG: Meghalaya a·doko niam gri chalaienggipa toll gate-rangko chipatna man·kujaengani gimin Meghalaya a·dokni Trinamool Congress (TMC), National People’s Party (NPP)-chi dilenggipa MDA sorkariko matnangataha.
Niam gri chalaienggipa toll gate-rangko chipatkujaengani gimin MDA sorkariko matnangatengon, an·tangan National Highway (NH) ramarangona re·ange kakketko mikrontangchi nie ra·echina gita TMC, a·dokni Deputy Chief Minister Prestone Tynsong-ko didiataha.
“Ia kragijagipa kamko ta·raken dontongna nangchongmota aro an·tangni office-o asonge, media-na tol·e agane roaigija deputy chief minister an·tangan ia kamko nirokenba ja·ku de·na nanga,” ine TMC-ni state vice president George B Lyngdoh aganaha.
A·dok sorkari nanga gitan ja·kurangko de·enga aro ramarango niam gri chalaienggipa toll gate-rangko ra·galattokaha ine Sukrobar salosan, a·dokni Deputy Chief Minister aganahachim.
Tynsong-ni agangipa kattarangko jegalatskaengon, tol·e taridapgipa koborrango pangchake dongaigija a·dokni deputy CM, jean a·dokni home minister-ba ong·enga, Secretariat-oni re·ongkatange, ramarango ong·enggipa obostarangko nie ra·ena nanga aro niam gri chalaienggipa toll gate-rangni kosako rakgipa ja·kurangko de·na nanga ine TMC-ni dilgipa parakataha.
“A·doko ong·enggipa obostarangko a·dokni MLA-rang aro minister-rang, nina nangani somoi ong·aha,” ine ua aganaha.
Truckers’ association-ko gronge, district level meeting-ko ong·atna man·jahani gimin Tynsong-ko matnangatengon, “A·dokni home minister, sakobasa chel·chakengama?” ine Lyngdoh sing·doataha.
TMC-ni parakatani gitade, a·doko toll gate-rangko niam gri chalaiengan baksana truck garirangko Umiam Dam gita re·na on·jaengahani a·selba dingtang dingtang bosturangni dam rakbatengachim.
“Iarangni a·selsa Meghalaya a·doko ma·manti bosturangni damrang komijaenga aro batesa rakbatroroenga,” ine Lyngdoh aganaha.
Deputy CM-ni a·kanganiko Meghalaya Commercial Truck Owners & Drivers Association-ba raken jegalataha aro a·dokni ramarango niam gri toll gate-rangko chalaiengkua ine parakataha.
