U·IATTIMGIPAONI
SHILLONG: Meghalaya a·doko Trinamool Congress (TMC)-ni dilgipa Dr Mukul Sangma, Bharatiya Janata Party (BJP)-o napskana gita agangrikenga ine koborrangko man·soengon, Assam a·dokni Chief Minister Himanta Biswa Sarma-ni a·selsa ua BJP-o napna man·kujaenga ine BJP-ni mitam dilgiparang parakatskaaha.
Sombar salo, BJP dilgipa saksani parakatani gitade, Mukul Sangma BJP-o napna man·na gita Assam a·dokni Chief Minister Himanta Biswa Sarma-sa ra·chakchengna nanggen.
Kobor on·timgiparangni u·iatani gitade, batanggimin salrango TMC-ni dilgipa Mukul Sangma, New Delhi-o BJP-ni dilgiparangko grongenba, TMC-ni MLA-rangko BJP baksa bakrimatani bidingo agangrikaha aro TMC-ni MLA-rang, BJP baksa bakrimangbebegenchimode, re·baenggipa jao dambonga a·dokrango ong·atgipa election-ni result-rangko parakani ja·man ong·naba gnangchim.
Indake ong·engon, salgro salaram jolo Assam a·dokni Chief Minister Himanta Biswa Sarma-sa BJP-ni bilakbatsranggipa dilgipa gita ong·enga aro ua Mukul Sangma-ko BJP-ona rimnapaniko nangnikjaenga ine BJP-ni mitam dilgiparang parakatskaaha.
Mukul Sangma, BJP-o napna gita Delhi-ona re·ange BJP-ni dilgiparang baksa agangrikeaha ine kobor on·gipani bidingo sing·on, ua an·tangde iani bidingo maming kobor man·soa dongja indiba Mukul Sangma BJP-ona re·bagenchimode uan BJP-na nambatgenchim ine BJP-ni state president Rikman Momin parakatskaaha.
