Mumbai, Indiao 26/11 terrorist attack ong∙ani bilsi chi∙bonga ja∙mano, India re∙anggipa Robibar-o dondike aro ka∙o nange nipilate nianiko dakaha indiba adita dongtokalaniko man∙aha. Ia subcontinental aro global leveloba terrorism-ni bilakroroaniko champengna gita bang∙a cholrangko dakengahanichi nom∙atna man∙engaha. An∙chingni a∙songo terrorismko nom∙atna gita kam ka∙anio bilakgipa sorkari dondikgija dingtang dingtang gadangrang gita rake kam ka∙e Indiani terros scenario-ko sinjetna man∙aha. Nigopate nigenchimode da∙o obostarang nambataona dingtangbaengahani gimin ka∙dimeaniko man∙enga aro Kashmirni kengnigipa biaprango aro song-nokrangoba manderangni janggi tangani tom∙tomengahanian uana sakki ong∙enga. 2008 bilsi jolo Pakistan-based terrorist-rang Mumbaini niksengbatgipa biaprangko joljol chadrapaha jeon sak 175 manderang janggi galaha aro sak 300na baten saknaa man∙aha; uan sal bri joljol chang 12 chadrapanirangko dake slai goanirangchi chadrapanirangko dakanichi ong∙achim. Terrorist-rang India gimikkon mamunkoba somoi gita dakchakna amjae jadip changataha aro a∙songko kengokate antisana kingking jripmitip ong∙ataha. Manmohan Singh-ni skotong ong∙e re∙dilgipa ma∙mong sorkari mamungkoba dakna changjae nigake dongbataiaha. Ua jakchomsa terrorist-rangko India chugimik bil dongeba warachakna tarisoa dongjachim, nitimani donggijagipa sima jolrangona Chinani1962-o napbae Indiani a∙ako apale kange ra∙angoba apsandake mamung simsaksoa dongjachim. Pakistani terrorist-rang ISI militaryni dakchakachi western commercial metropolis-o, 2008-o napdraon India, Pakistan militaryko jakbikpile a∙jak sokna chol man∙achim. Indiba India jripjrip dongaiaha. Indiba CRPF convoy-ko Pulwamao terrorist attack ka∙on antignini gisepon India jakbikpilaniko dakaha. Ua Pakistan a∙jaona, jean military Headquarter, Rawalpindi sambaona military jet-rangko watate Balakot-o donggipa terror camp-rangko bom galdapeaha. Iana Pakistankoba apsan daken kratcha∙a baksa kenjagokataha. Uan Pakistanni katta dal∙e aganronggipa general-rangkoba kenjagokataha; una skangde uamangara Indiako, sima ga∙bate Pakistanchi napode nuclear bomchi galdapna ka∙mikenatrongachim.
ISI aro uni generalrang da∙oba ua obostao kenjagokaoni nampilna man∙kujaenga, Pakistanni political establishment-ba bilgribegipa obostaosa ong∙enga. Islamic a∙songrangni terror networks bnekatna USni rake kam ka∙anichi global terror scenario da∙o nambataoba dingtangatako man∙engaha. Pakistang aro Afghanistan a∙songrangni terrorist camp-rangba da∙ode jripjrip ong∙atako man∙tokaha. Syria IS networkko pe∙galaha aro uamangni dilgiparangko US saksani ja∙mano saksa, so∙ote galaha. Terror networks-ara a∙gilsakni a∙songrangni ku∙cholsan ong∙e bilakgipa militaryni bilko ruute dakgrikchakna bil amchakjaha. Islamic world-ni mitam dictator-rangkoba pe∙gale ra∙gale galanichi ta∙raken tom∙tomaniko ra∙bana man∙aha. Sri Lanka-omangba LTTE, bilakgipa dilgipa ua chichang a∙songko chalaiani bilko jako ra∙on bnekatako man∙aha ine gisik ra∙atna man∙gen.
