U·IATTIMGIPAONI
SHILLONG: Re·baenggipa 2024 bilsini Lok Sabha election-o Trinamool Congress (TMC), Meghalaya a·doko susagenma susajawa da·o dipet high command-ni u·iatanina sengkuengoba, Meghalaya a·dokni Shillong aro Tura Lok Sabha seat damgnion candidate-rangko susaatna nangnikenganiko TMC-ni dilgiparang parakatskaaha.
Songadam nokadamrango TMC-na rakbee kam ka·enggipa manderangni kamrangko nigrike a·dokni seat damgnion candidate-rangko susaatna nangenga ine janapatengon, “Batanggimin chang election-o a·dokni salaram jolchipaksa TMC name dakna man·jaha indiba saliram jolchipakde chinga namen dakna man·ahani gimin chingni chu·sokaniko nie ia Lok Sabha election-oba chinga bilakbatatna man·gen,” ine TMC Parliamentary Party-ni dilgipa Mukul Sangma parakataha.
Sangma-ni aganani gitade, a·songni gita niatgenchimosa TMC-ba India Block-ni bak ong·e, high command-ni nangnikaniko sengna nangkuenga indiba a·dokni gitade uamang Lok Sabha election-o candidate-rangko susaatna nangnikenga.
Re·baenggipa 2024 bilsio BJP-ko ga·akatna miksonge Indian National Developmental Inclusive Alliance (INDIA)-o gimik dol 28 political dolrang bakrime kamrangko ka·enga aro iano TMC-ba bak ong·paengachim ine nikna man·a.
Lok Sabha election-o susana gita candidate-rangko sandiahama ine sing·anina aganchakaniko on·angskaengon, “Da·o dipet chinga election-o susagenma susajawa ukon name tik ka·chengkuja aro candidate-ko seokna skangde iakon tik ka·chengna nangenga,” ine Sangma parakataha.
Candidate-rangko seokani bidingo high command baksa agangrikani gimin janapatskaengon, ia jani gisepon high command-ni dilgiparang chinkode on·atmanaha aro iani kri a·dokni dilgiparang kamko ka·anggen ine TMC Parliamentary Party-ni dilgipa aganaha.
