U·IATTIMGIPAONI
SHILLONG: Personnel, Public Grievances & Pension Ministry-ni office memorandum (OM)-o tik ka·gimin gita ma·mong sorkarini Group ‘C’ aro ‘D’ ning·o ga·akgipa kamrangna kam ka·giparangko seokanio, Meghalaya a·dok ning·o donggipa pilak central office-rang aro institute-rangoba ia niamko ja·rikna gita ge·etaniko on·china Budbar salo, Hynniewtrep Youth Council (HYC), a·dok sorkariko didiataha.
A·dokni Social Welfare Minister Paul Lyngdoh-ko iani bidingo grongani ja·man kobor ra·timgipa manderang baksa agangrikengon, Group C aro Group D-ni kamrangnade ST, SC aro OBC-rangna dingtangmancha reservation dongna nanga ine 2005, 2007 aro 2022 bilsioba Personnel, Public Grievances & Pension Ministry, dingtang dingtang a·dokrango donggipa ma·mong sorkarini office-rang aro central institute-rangna ge·etaniko on·manahachim ine HYC-ni president Roy Kupar Synrem parakataha.
“Ia ministry-ni OM-o janapani gitade, Meghalaya a·doknade Group C aro Group D-ni kamrango ST-rangna 44 percent-ko chamna ge·etani dongani gimin Meghalaya a·doko donggipa ma·mong sorkarini pilak office aro central institute-rangon 44 percent-ko chamna nangani ong·achim,” ine Synrem aganaha.
Indake ong·genchimoba a·dokni bang·bata office aro institute-rangon Ministry-ni on·gimin ge·etaniko ja·rikjaenga ine HYC-ni president, suk ong·gijaniko parakataha.
Synrem-ni parakatani gitade, NEHU-o non-teaching staff-ni kamrangna advertisement-ko on·manaha ine uamang kobor man·soahani giminsa iani bidingo Social Welfare Minister-ko gronge agangrikeaha.
