U·IATTIMGIPAONI
AMPATI: South West Garo Hills a·jao Viksit Bharat Sankalp Yatra-ko a·bachengatna gita Budbar salo, District Rural Development Agency (DRDA)-ni gita dingtangmancha program-ko Ampati-ni Multi Facility Centre-o ong·atangaha.
Ia Viksit Bharat Sankalp Yatra-ra, dingtang dingtang scheme aro program-rangni bidingo a·song gimikni manderangna u·iatna gita ma·mong sorkarini a·bachengatenggipa program ong·achim ine nikna man·a.
Ia program-ni ning·o, ma·mong sorkarini ra·gatgipa dingtang dingtang scheme-rang, jekai Ayushman Bharat-PMJAY, PM Garib Kalyan Anna Yojana, PM Awas Yoyana, PM Ujjwala Yojana, PM Vishwakarma, PM Kisan Samman Nidhi, Kisan Credit Card, Poshan Abhiyan, Jal Jeevan Mission, SVAMITVA, Jan Dhan Yojana aro uandakgipa scheme-rangko man·chapenga.
Ia Viksit Bharat Sankalp Yatra-ko a·bachengatanio South West Garo Hills a·jani Deputy Commissioner RP Marak, jinmana aganprakangengon, songadam nokadamrango donggipa manderangde an·tangtangni namgnina ra·gatgipa dingtang dingtang scheme aro program-rangni gimin ma·sitokkujaengani gimin ia Viksit Bharat Sankalp Yatra-ra, ma·mong sorkarini ra·gatgipa scheme-rangni gimin u·iatna gita namen nambegipa chol ong·enga ine parakataha.
Ia program-ni ning·o Agriculture department-an Nodal department ong·enga ine janapatengon, ia program-ni ning·o Block aro VEC-ni level-o dingtang dingtang dake kamrangko ka·na South West Garo Hills a·jani dam 540 songrangko nisan dongen ine Marak parakataha.
Ia tom·anio ua, dingtang dingtang scheme-ni namgnirangko man·na gita Aadhar-ko link ka·na nangani giminba songni nokni manderangna agan-talate on·angaha.
Ia tom·anio, SWGH a·jani Additional Deputy Commissioner aro DRDA-ni Project Director RZD Shira-ba jinmana aganprakengon, ia Viksit Bharat Sankalp Yatra-ni ning·o dongimin niamrangni bidingo agan-talate on·angskaaha.