U·IATTIMGIPAONI
TURA: Garo Hills-ni badiaba badiaba biaprango Jal Jeevan Mission (JJM)-ni kamrangko name ka·jaengani a·sel songni nokni manderang chirangko man·tokjaenga ine matnanganirangko man·engani gimin Garo Hills-o dingtangmancha JJM-ni kamrangko nambate nirokchina gita A·chik Organisation for Social Welfare (AOSW), a·dokni PHE Minister Marcuise N Marak-na sedoataha.
PHE Minister-na sedoatgipa chittio AOSW-ni parakatani gitade, Garo Hills-ni mitam songrango JJM-ni kamrangko namen matchotate on·ahaoba badiaba badiaba songrangode kamrangko name ka·jaengani a·sel songni nokni manderang da·o ringani chirangnan dilna nangtokskaengahachim.
“JJM-ni kamrangko ka·enggipa contractor-rang, an·tangtangni man·gninamangmang chanchie kamrangko ka·engani a·sel badiaba badiaba songrangode kamrangko name chu·sokate on·jaenga aro iani a·selan songni nokni manderang da·o chirangko man·ani pal batesa china dilskana nangengaha,” ine AOSW-ni dilgiparang parakataha.
Garo Hills-o JJM-ni kamrangko name nirokchina didiatengon, ia kamko chu·sokatanio uamang pilak nanga dakchakanirangko aro bakrimaniko sorkarina on·na kusi ong·aigen ine AOSW, PHE Minister-na ku·rachakaniko on·ataha.
