U·IATTIMGIPAONI
SHILLONG: VPP-ni ja·mano, NPP-ba re·baenggipa Lok Sabha poll-na a·doko uamangni campaign-ko mijalo a·bachengataha, unomitingo mitampak national party-rangde uamangni party candidate mangmangkoba mingan dongsrangkujachim.
Shillong Parliamentary seat-na minggimin NPP candidate, Ampareen Lyngdoh, mijalo mingsa tom·aniko ong·atenba campaign-ko a·bachengataha, jeon Jaintia Hills region-ni MLA-rang, MDC aro NPP dilgiparang bakko ra·angaha.
Koborni manderangna ku·baltiengon, tom·anio manderangni bak ra·aniko niede re·baenggipa Lok Sabha election-o NPP-an cheaigen ine niksoenga ineba NPP-ni a·gipi dilgipa Sniawbhalang Dhar aganaha.
Uano tom·rimaniko dakani ja·mano, Ampareen Lyngdoh-na chakpagiparangko salna man·na gita Jaintia Hills-ni dilgiparang da·o gipin district-rangonaba re·e campaign ka·aniko dakna gita miksongtokenga.
Shillong seat-ni bidingo VPP-ni a·sel NPP-na maiba jajrengsoani dongama ine sing·on, pilak party-rangan uamangni cheanina an·tangtangni kamtangtangko ka·tokgen aro NPP-ba apsandaken kam ka·gen ine Dhar aganaha.
