U·IATTIMGIPAONI
SHILLONG: Ma·mong sorkarini ra·gate on·gipa dingtang dingtang scheme-rangni bidingo songni nokni manderangna u·iataniko on·na gita Viksit Bharat Sankalp Yatra-ko a·bachengate on·ahani gimin BJP-chi dilenggipa ma·mong sorkariko, Meghalaya a·dokni Bharatiya Janata Party (BJP) mittelpilangaha.
Iani bidingo Sukrobar salo, kobor ra·timgipa manderang baksa agangrikengon, ma·mong sorkarini ra·gate on·gipa dingtang dingtang scheme-ni namgnirangko man·china gitasa ma·mong sorkari, songchi nokchi re·ange songni manderangna agan-talate on·na gita ia Viksit Bharat Sankalp Yatra-ko a·bachengataha ine BJP Meghalaya-ni spokesperson M Kharkrang parakataha.
Kharkrang-ni aganani gitade, ia program-ni ning·o sorkarini official-rang, dingtang dingtang songrangona re·ange, ma·mong sorkarini ra·gate on·gipa dingtang dingtang scheme-rangko uamangni nokrangona sokate on·na agan-talatanirangko on·enga.
Ia program-chi, songni nokni manderangna dingtang dingtang scheme-rangni bidingo agan-talate on·anggen ine janapatengon, songni nokni manderangna namgnirangko on·na gita dingtangmancha bimingrangkoba segatanggen ine BJP-ni spokesperson parakataha.
Badiaba badiaba songrangonade ma·mong sorkarini on·atenggipa scheme-rang sokangjaengani gimin ia program-ko a·bachengatanichi songni nokni manderangna sorkarini on·enggipa namgnirangko sokate on·na man·gnok ineba Kharkrang aganaha.
