U·IATTIMGIPAONI
TURA: East Garo Hills a·jao dingtang dingtang Eco-Tourism project-rangna chamatgipa tangka paisarangoni gong kror 1300-na baten jakkalsretaha ine Niksamso Garo Community Organisation (NGCO) matnangataha.
NGCO-ni parakatani gitade, ia project-rangko lekkarangode matchotaha ine seahaoba, ia project-rangko re·ange nigenchimode, buring dikkripe dongakosa nikna man·aiahachim.
Iani bidingo talataniko on·angengon, “2017 bilsio a·bachengatgipa iandakgipa project-rangoni ming 9 project-rangko lekkarangode matchotaha ine seahachim indiba kamrangko matchotgija galchipaiaha. Ia project-rangna gimik gong kror 1361.45 tangkarangko chame, ja 18-ni gisepon matchotna gita somoiko on·manahachim,” ine NGCO-ni president Tengrak B Marak talataniko on·angenba, iani bidingo uamang department-o RTI ka·e ma·sina man·aha ine parakataha.
Marak-ni parakatani gitade, ia project-rangoni mingsade Gitokgre Eco-Tourism ong·achim aro uamang ia biapko re·ange nion, nokko matchotgija da·o ia nokni wilwilao buring dikkripe dongakosa uamang nikna man·ahachim.
Ia project-rangna chamatgipa gong kror 1361.45 tangkarangkode oke ra·manaha ine janapatengon, “Ian chingni nikanio namen kragijani ong·a aro manderangni namgnina chamatgipa tangka paisarangko iandake jakkalsretania namen ra·chakna man·gijani ong·a. Je manderangan ia kamrango jak dongachim, uamang pilakni kosakon am·sandianirangko dakenba rakgipa ja·kurangko de·na nanga,” ine NGCO-ni president parakataha.
Banoba iandake tangka paisa jakkalsretanirangko nikgenchimode uamangna u·iatchina manderangko didiatengon, iandake tangka paisa jakkalsretaniko bon·atna gita NGCO rakbee kamko ka·angkugen ine Marak parakataha.