U·IATTIMGIPAONI
SHILLONG: Sombar salo, Farmers’ Day-ko maniani bak gita gittamgipa changna Meghalaya Farmers’ Parliament-ko Shillong songjinmani State Convention Centre-o ong·atangaha aro ia program-ko a·dokni Chief Minister Conrad K Sangma, do·ga oe on·angaha.
Ia Farmers’ Parliament-ko ong·atanio a·dokni Animal Husbandry & Veterinary Minister AL Hek, Agriculture & Farmers Welfare Minister Ampareen Lyngdoh, dingtang dingtang official-rang aro a·dokni dingtang dingtang biaprango game ge·e cha·enggipa manderangba bakko ra·angtokaha.
Ia program-ko ong·atanio, game ge·e cha·ani kamrango dakchakanirangko on·na gita dingtangmancha Regeneration Meghalaya program-koba Chief Minister, a·bachengate on·angjolaha.
Meghalaya Farmers’ Parliament-ko a·bachengate on·anganio a·dokni Chief Minister, jinmana aganprakangengon, game ge·e cha·enggipa manderangni kamko nienba mittelpilna gita ia Farmers’ Parliament-ara namen nangchongmotgipa program ong·a ine parakangaha.
“Ia parliament-ara, a·doko game ge·e cha·enggipa manderangni janggi tanganiko namdapatna gita uamangni kamrangko mittelpilna aro dakchakanirangko on·na gita ong·atenggipa program ong·a,” ine ua aganaha.
Regeneration Meghalaya program-ni gimin talataniko on·angengon, ian gama ge·ani kamrango dakchakaniko on·na ra·gatgipa program-ni bak ong·a aro ia program-chi game ge·e cha·giparangna dingtang dingtang kamrango dakchakanirangko on·na man·gen ine Chief Minister parakataha.
Regeneration Meghalaya project-ko chu·sokgipa ong·atna gita ia project-o bak ong·enggipa pilak dolrangkon, songni nokni manderang baksa nangrime kam ka·china gitaba Chief Minister didiangaha.
Ia program-ko ong·atanio, FOCUS, PES aro Piggery Mission-ni ning·o namgnirangko man·enggipa manderangna dingtangmancha a·dokni Chief Minister, cheque-rangkoba sualatjolaha.