U·IATTIMGIPAONI
AMPATI/RESUBELPARA: A·gilsakni gipin biaprango gitan Garo Hills-ni dingtang dingtang biaprangoba International Day of Persons with Disabilities ba be·enni gita cholgri ong·gipa manderangni salko Sombar salo maniangtokaha.
South West Garo Hills a·jao ia salko District Social Welfare Office-ni gita Ampati-ni Multi Facility Centre-o manidilangaha aro ia salko manianio South West Garo Hills a·jani Additional Deputy Commissioner (ADC) Dr Rezina Marak, mongsonggipa sokgipa ong·e jinmana aganprakangengon, be·enni gita cholgri ong·gipa manderangna janggi tangani cholrangko on·na nangani gimin aganangenba, uamangna on·gimin bil aro dingtang dingtang scheme-rangni bidingo ma·siate on·na nangengani gimin agan-talatanirangko on·angaha.
Ma·mong sorkarini scheme-rangko ra·na gita Aadhar card-ko nangtelengahani gimin talataniko on·angengon, be·enni gita cholgri ong·gipa manderangna dingtang dingtang department-rango dingtangmancha biaprangko a·kangani donga ine Dr Marak parakataha.
SWGH a·jao dingtangmancha be·enni gita cholgri ong·gipa manderangna ia salko manidilahani gimin ua dingtangmancha Social Welfare department-ko mittelpilangaha.
Ia program-ko ong·atanio SWGH a·jani District Immunisation Officer Dr Noreen Sangma aro District Legal Services Authority (DLSA)-ni Advocate A Hussain, be·enni gita cholgri ong·gipa manderangna on·gimin bilrangni gimin agan-talatanirangko on·angskaaha.
Ia salko maniani bak gita dingtangmancha be·enni gita cholgri ong·gipa manderangna kal·susaanirangko ong·atangan baksana dingtangmancha free health check up-koba ong·atangaha.
Apsan daken North Garo Hills a·jaoba ia be·enni gita cholgri ong·gipa manderangni salko Mendipathar-ni Salpara Community Hall-o maniangaha aro ia program-ko ong·atanio North Garo Hills a·jani ADC Kapil Koch, mongsonggipa sokgipa ong·e bakko ra·angaha.
Ia program-ko ong·atanio Kapil Koch, jinmana aganprakangengon, songsalni aro a·songni namgnina dingtang dingtang kamrangchi on·gilahani gimin be·enni gita cholgri ong·gipa manderangko mittelpilangaha.
Mikgrirangni robol kal·susaanio chu·sokanggipa Garo Hills-ni robol kal·gipa Klingson Marak aro civil services porikkao chu·sokna man·gipa me·chik Ira Singhal-ni giminba ia tom·anio ua dingtangmancha toe aganangaha.
Be·enni gita cholgri ong·gipa manderangni changa sapanirangko nienba, janggi tangani cholrangko on·na nangengani giminba ia tom·anio dingtangmancha Koch aganangaha.
Ia program-ko ong·atanio dongpae jinmana aganprakanggipa gipin manderangara, North Garo Hills a·jani Senior Sub-Divisional Medical & Health Officer Dr NR Marak, District Social Welfare Officer NA Sangma aro gipinrang ong·a.