U·IATTIMGIPAONI
SHILLONG: Meghalaya a·dokni skulrango class 1-oni class 10-ona NCERT-ni textbook-rangko ra·gatna sorkarini miksongenganiara da·o aro mikkangchiba manderangoniko ra·seke ra·ani gitasa ong·gnok ine a·dokni gitcham chief minister aro Trinamool Congress (TMC) parliamentary party-ni president Mukul Sangma parakatenba, a·doko NCERT-ni textbook-rangko ra·gatjachina a·dok sorkariko didiataha.
Meghalaya Board of School Education (MBOSE)-ni ning·o class 1-oni class 10-ona NCERT-ni text book-rangko ra·gatna gita adita salrangna skangsan a·dok sorkari tik ka·angahachim ine nikna man·a.
A·doko NCERT textbook-rangko ra·gatna tik ka·aniko jegalatengon, “Ia ong·gijagipa ja·ku de·aniko dakjachina anga sorkariko aganenga. NCERT textbook-rangko ra·gatgenchimode da·o aro mikkangchiba manderangni bilko ra·sekani gitasa ong·gnok aro iako chinga ong·na on·na man·jawa,” ine Sangma aganaha.
“Je a·dokrangan a·doktangni education board donga, una rasong chanasa nanga,” ineba ua aganaha.
Uni chief minister ong·engmiting somoio ia apsan dakgipa proposal-kon uona ra·baahachim ine gisik ra·atpilangengon, “Na·simango board donga ong·ode maini gimin gipinrangna bate syllabus-ko nambate tarina man·jaenga? A·doko NCERT textbook-rangko ra·gatna aganeba na·simang Khasi aro Garo ku·sikrangko Constitution-ni Eighth Schedule-o napatna gita dabienga. Ki·tap segiparang an·chingo dongpileba NCERT-ni tarigimin ki·taprangkosa na·simang brena nangnikenga?,” ine Sangma, a·dok sorkariko sing·doataha.
A·doktangni education board-ko gamchatnikchina aro sakgipinni curriculum-o pangchakaigija an·tangtangan ki·taprangko sechina gita ua a·doko ki·tap sena gisik nanggipa manderangkoba didiataha.