U·IATTIMGIPAONI
SHILLONG: Khasi ku·sikkoba Constitution-ni Eighth Schedule-o napatna gita Bill-ko draft ka·china mol·mole Union Ministry of Home Affairs (MHA)-na seatjahani gimin a·dokni Chief Minister Conrad K Sangma-ni kamo Khasi Authors Society (KAS) suk ong·gijaniko parakataha.
Iani bidingo kobor ra·timgiparangna tarlataniko on·angengon, Delhi-oni re·bapilani ja·man KAS-ni dilgiparang, a·dokni chief minister-ko gronge, Parliament-ni Winter Session-ona official bill-ko ra·angna man·na gita ma·mong sorkariko mol·mole chitti sedoatchina didiahachim ine KAS-ni president DRL Nonglait parakataha.
Nonglait-ni u·iatani gitade, Chief Minister an·tangba dingtangmancha iani bidingo chittiko tarina aro nangani kri sorkarini gitaba dakchakanirangko on·na KAS-ni dilgiparangna ku·rachakaniko on·atahachim.
“Official bill-ko tarichina mol·mole MHA-na a·dok sorkarini seatgipa chittiko man·soama man·sokuja chinga pangnan Chief Minister’s Office (CMO)-oniko nirongahachim indiba Political department, maming chittikon MHA-na seatchipjaha. Parliament-ni Winter Session-ko Sombar salon a·bachengahani gimin da·ode ja·manchakgnok,” ine KAS-ni president, suk ong·gijaniko parakataha.
Nonglait-ni parakatani gitade, Khasi ku·sikko Constitution-ni Eighth Schedule-o napatna gita bill-ko tarie Parliament-ona ra·angchina KAS-ba dingtangmancha MHA-na mol·mole seatahachim.
“Indake ong·genchimoba chingni mol·mole seatgipa chittina MHA maming aganchakanirangko on·chipjaha. Iani bidingo a·dok sorkari, MHA-na seatskagenchimode haida ia mol·molaniko knachaknaba gnangchim,” ine ua aganaha.
Indake ong·engon, Khasi ku·sikko Eighth Schedule-o napatna gita maikai uamang ma·mong sorkariko didina man·gen, iani bidingo chanchirimna gita bakan KAS-ni executive committee tom·aniko ong·atgen ineba Nonglait parakataha.
Iani bidingo, dingtang dingtang dolrang aro manderang jinma baksa tom·e chanchirimna gita man·gen ineba ua aganaha.
Iani dabianio, Meghalaya a·dokni MP sakgittam aro a·dok sorkari bakrimaniko on·jaenga ineba KAS-ni president, suk ong·gijaniko parakataha.