U·IATTIMGIPAONI
SHILLONG: Khasi aro Garo ku·sikrangko Constitution-ni Eighth Schedule-o napatchina gita ma·mong sorkario dabiangkugen ine United Democratic Party (UDP) ku·rachakaniko on·angaha.
“Meghalaya a·dokni mongsonggipa ku·sik minggniko Eighth Schedule-o napatchina dabianiara skangonin dabienggipa ong·a aro iani bidingo Assembly-o resolution-ko ra·pilahaoba da·onan chu·sokgipa ong·kujaenga,” ine UDP-ni president Metbah Lyngdoh aganaha.
Khasi Authors Society (KAS)-ni New Delhi-ona re·ange iani bidingo asonge jingjengatanio UDP-ni membor-ba bak ra·angpaahachim ine talataniko on·angengon, ia dabianiko chu·sokatkujaskal UDP, ma·mong sorkariko didiangkugen ine Lyngdoh parakataha.
Khasi aro Garo ku·sikrangko Eighth Schedule-o napatchina dabiangkuan baksana a·dokni dingtang dingtang nanganirangnaba ku·rangko on·angkugen ineba UDP-ni president parakataha.
Gital Assembly building-ko ta·raken matchotatchina uamang nangnikenga ine janapatskaengon, “Ia gital Assembly building-ko anga somoi gita matchotatna gisiko nangbee kamko ka·ahachim indiba rasong grie ia gital Assembly-ni protchong be·gruenba ja·donggaatako man·kuaha,” ine Meghalaya Assembly-ni gitcham Speaker aganaha.
Mawdiangdiang-o rikenggipa gital Assembly building-ko nieani ja·man, ia gital Assembly building-ko re·baenggipa 2024 bilsini July ba August jao matchotna gita somoiko donaha ine adita salrangna skangsan, Meghalaya Assembly-ni Speaker Thomas A Sangma parakatahachim.
