U·IATTIMGIPAONI
SHILLONG: Ia 2023 bilsini Meghalaya Teachers Eligibility Test (MTET)-o ong·gija ‘answer key-rangko’ on·a ine MTET segipa candidate-rangni matnangenggipani bidingo nanga gita ja·kurangko de·china ge·etaniko on·ataha ine Sukrobar salo, a·dokni Education Minister Rakkam A Sangma parakataha.
Sukrobar salo, KSU education cell-ni membor-rangko an·tangni dongchakenggipa noko grongani ja·man kobor ra·timgipa manderang baksa agangrikengon, MTET-ko segipa candidate-rangni answer sheet-o pangchakesa MTET-ni correction aro evaluation-ko dakgen ine Education Minister parakataha.
Indake ong·engon, ia bilsini MTET-o ong·gija answer key-rangko on·ani a·sel porikkako segipa candidate-rang neng·nikanirangko chagrongna nangtokengani gimin a·dokni Education Minister, candidate-rangni jajrengchakanirangko niatna ku·rachakaniko on·ataha ine KSU-ni assistant education secretary Shelkitbok Kharbani parakatskaaha.
MTET-ko segipa candidate-rang, ong·gija answer key-rangko on·a ine matnangtokengani gimin iako niatchina gita a·dokni Education Minister, an·tangni officer-rangko ge·etna ku·rachakaniko on·ataha ineba Kharbani aganaha.
Kharbani-ni parakatani gitade, MTET segipa candidate-rang, maibani a·sel chu·ongnikaniko man·jaenga ong·ode namdapataniko dakchina didina man·gen ineba Education Minister, uamangna ku·rachakaniko on·ataha.
Iana skang, Education Minister-na seadoatgipa chittio KSU education cell-ni parakatani gitade, Paper I (LP level) aro Paper II (UP Level)-na on·gipa answer key-rang ong·tokjani gimin bang·a candidate-rangan badi ka·doangtokahachim.
Ia porikkako sena gita an·tangtangni somoirangko aro tangka paisarangko jakkalgipa chatro chatrirang, iani a·selan bang·en jajaatanirangko man·na nangtokaha ineba KSU education cell parakataha.
MTET-ko segipa candidate-rangni namgnina iani bidingo ta·raken nipiltaianiko dakenba nanga gita ja·kurangko de·chinaba KSU, Education Minister-ko didiataha.
