U·IATTIMGIPAONI
TURA: Jengjal-ni Baljek Airport-o ong·atanggipa Me·gong Festival-ni bak gita skanggipa changna Me·gong International Literary Festival-ko Tura-ni Don Bosco College, A·chik Literature Society (ALS) baksa nangrime Sonibar salo ong·atangaha.
Ia Me·gong Literary Festival-ko ong·atanio a·dokni Chief Minister Conrad K Sangma baksana Education Minister Rakkam A Sangma-ba bak ra·angaha aro ia program-o Garo Hills aro Bangladesh a·songoniba sea jotanio gisik nanggipa manderang bakko ra·angenba, jinma agan-chanchirimanirango bak ra·angtokaha.
Ia Literary Festival-ko a·bachengatanio a·dokni Chief Minister, jinmana aganprakatengon, skanggipa changna Me·gong International Literary Festival-ko ong·atahani gimin Tura-ni Don Bosco College aro A·chik Literature Society-ko mittelpilangenba, A·chikrangni sea jotaniko tang·doatna gita a·dok sorkariba kamrangko ka·enga ine parakataha.
Jatni sea jotani kamrangko tang·doatna miksonganiosa sorkari, Babadam-o Tribal Institute-ko rikenga ine janapatengon, ia Literary Festival-ara A·chikrangni daka rikani, man·rikani aro cha·ani ringanirangko tang·doatna Me·gong Festival-ko apalbatatanian ong·enga ine Chief Minister parakataha.
