U·IATTIMGIPAONI
SHILLONG: North Eastern Hill University (NEHU)-o Rohit Prasad minggipa mande saksako niam grisa technical officer/senior consultant-ni kamo rakkiaha ine batanggimin jarangonin dingtang dingtang dolrangni nangrime bikotgipa Joint Action Committee (JAC), ia mandeko kamoniko ra·galpilchina dabitokahani gimin ia officer-ko NEHU-ni Vice Chancellor Prof PS Shukla, kamoniko ra·galatpilaha.
JAC membor saksani kobor ra·timgiparangna parakatani gitade, Rohit Prasad-ko uni kamoniko ra·galpilna gita tik ka·aha ine NEHU-ni VC, JAC-ni dilgiparangna u·iataha.
NEHU-o ia officer-ko niam gri kamo rakkiahani gimin NEHU-ni skigiparang aro kam ka·enggipa manderang, jegalanirangko daktokengon, da·o gital dakgipa obostakoba knasona man·taiskaahachim.
Kobor on·timgiparangni u·iatani gitade, College Development Council (CDC)-o bak ong·enggipa engineer saksani kosako tangka paisarangko jakkalsreta ine matnanganirangko man·ahani gimin JAC-ni membor-rang, iani giminba tom·e chanchirimna siengachim.
JAC-ni dabienggipa gipin kamrangni bidingo NEHU-ni ja·ku de·anirangkoba JAC-ni dilgiparang nipilna gita miksongengachim.
Rohit Prasad-ko kamoniko ra·galpilchina dabianiko man·chape JAC-ni dingtang dingtang dabianirangko nipilna gita NEHU-ni VC, salbonga somoiko bi·dapahani gimin NEHUTA, NEHUNSA aro NEHUSU dolrangni nangrime bikotgipa JAC-ni indefinite strike ka·aniko November 16 tarikon dontongatpilahachim ine nikna man·a.
JAC-ni mongsonggipa dabianirangara, niam gri technical officer/senior consultant-ni kamna seokako man·gipa Rohit Prasad-ko ta·raken kamoniko ra·galpilchina, statutory officer aro university engineer-rangko ta·raken songchina, University Health Centre-ko namdapatchina aro NEHU-ni skigiparang aro technical staff membor-rangko ministerial duty-rangoniko watchina, NEHU-o bus service-ko on·dapchina, chi aro bijoliko nambate on·china, health centre, pension cell, block level-oni songadam nokadamrangona quota-ko nipilchina aro uandakgipa dingtang dingtang dabianirangan ong·achim.
