U·IATTIMGIPAONI
SHILLONG: Sombar salo, East Jaintia Hills a·jani Superintendent of Police (SP), Meghalaya High Court-o mikkangpaenba a·doko niam gri koela bikotani aro salruraaniko champengna ka·enggipa kamrangni bidingo talate on·angaha.
Chang 18-gipa interim report-o janapani gita, a·dokni dingtang dingtang koela a·damrango nikenggipa metric ton (MT) 4800 koelarangko sorkari sekaha ineba ua talate on·angaha.
Chang 18-gipa interim report-o janapani gita, niam gri koela bikotaniko champenggipani bidingo chu·gimik report-rang Justice (Retd) BP Katakey-ni jakon ong·kuengpiti aro ia report-ko ua High Court-na mesokna nangkuengpiti ineba Advocate General, Meghalaya High Court-na mesoke on·angaha.
Indake ong·engon, gital report-ko man·kujaskalde da·o dipet kachari maming raiko on·na man·kujawa ine Justice Katakey-ni report-ko sengkuna gita iani bidingo December 19 tariko hearing-ko daktaina High Court parakataha.
Koela a·damrango nikgimin MT 5,50,000 koelarangko Coal India-ni gita salenba dakkujaenga aro Justice Katakey committee-ni ge·etani gita ia kamko ia bilsini December jani gisepon matchotatna nangenga ineba High Court parakataha.
Ia dongimin somoiko ja·rikgen ine ka·dongchakaniko parakatengon, nikgimin koelarangko ia bilsini bon·angachibara dakkie matchotatchina High Court ge·etaniko on·ataha.
“East Jaintia Hills SP-ni kachario mikkangpaaniko da·o dipet ianon bon·atenga aro mikkangchi bangki dongkuenggipa kamrangna sengkuenga,” ine High Court parakataha.