U·IATTIMGIPAONI
BAGHMARA: South Garo Hills a·jani Gasuapara jolo donggipa skul damsao skigipa gri ong·e donga da·o bilsi gittam batpilengahani a·sel skulo poraienggipa bang·a bi·sarangan da·o skulrangchi re·tokjaengaha ine A·chik Holistic Awakening Movement (AHAM) parakataha.
Koborko on·ani gitade, AHAM Gasuapara unit-ni dilgiparang, AHAM-CEB HQ-ni general secretary Clinton R Marak baksa Mongolbar salo, Wakebokgre Govt LP skulona re·ange nion, ia skulo skigipa donggija da·o bilsi gittam batpilengaha ine ma·sina man·aha.
“Ia skulko bilsi gittam batpile skigipa gri chalaiengani a·sel da·o skulo poraienggipa bang·a bi·sarangan skulrangchi re·tokjaengaha,” ine AHAM CEB-ni general secretary parakataha.
Ia skulo skigiparang dongjan baksana skul nokni obostarangba namsrangjahani a·selan poraienggipa bi·sarangsan ong·aigija kamko ka·enggiparangba neng·nikanirangko chagrongna nangtokengaha ineba ua parakataha.
“Skulo skigipa dongjan baksana skul nokni obostarangba namsrangjahani a·selan songo noko bida budina ka·oksienggipa manderang aro mongsongbate bi·sarang, a·gilsakni seng·aniko man·tokjaenga aro ia songni obostako namjabatatenga,” ine Marak parakataha.
Ia skulna ta·raken skigipako watatchina aro skul nokrangko tarie on·china gitaba AHAM, a·dok sorkari aro a·dokni Education Minister Rakkam A Sangma-ko didiataha.
