U·IATTIMGIPAONI
SHILLONG: A·doko maming petrol aro diesel-ni gimin neng·nikanirang dongja, gimik obostarango da·omitingo bilni ning·on dongenga, ine A·dok sorkari aganaha.
North East Petroleum Mazdoor Union (NEPMU), jemangan Meghalaya-o torangko watataniko dontongna ka·mikkenatengachim, uamang an·tangni memborrangko neng·nikatenga aro dontongataikugen, ine aganaha.
“Chinga indakgipa jangbingbanggipa kattarangni gimin knachakna nangja, maina ia koborrangra jinma manderangna neng·nikaniko ra·bani ong·gen, chinga da·onitingo iani bidingo chanchirimaniko dakkuenga, aro namatna jotton ka·enga, indiba una agreba petrol aro diesel-ko rang·gitik dontongatani kattarang a·doko dongja,” ine cheif minister Conrad K Sangma aganaha.
“Anga indake mol·molna skaa, chingoni gita maming jajrenganirang dongja, indakgipa obostarang ong·genchimode chinga an·tangan u·iatgen, indiba da·omitingo gimik obostarang chingni bilni ning·on dongkuaha,” ine ua agandapaha.
Ia mamlani bidingo Chief Minister Conrad K Sangma agana, ” chingna dingtang dingtang petrol pump-rangoni badi ka·anirang sokbaha, a·dokkona ra·bagipa tanker-rangoniko 10-15 percent basakoba 20 per cent-ni gita to rangko bikote ra·rikaha, jean petrol pump-na bang·a noksan ong·aha,”.
“Ia badi ka·anirango pangchake Ri-bhoi police dal·begipa operation-ko ka·aha, aro uamang dal·begipa sakkiko man·aha, jeon ia mamlani bidingo jak donggipa mitam manderangko rim·aha, ia kamrangko police ka·enga ingipa kattara kaket ong·gipa ong·ja. Police, petrol pump-ni nokgiparangni badi ka·anio pangchake rakken kamrangko ka·enga,” ine ua agandapaha.
Ia obostani bidingo golpoanirangko dakenga, ine u·iatanio ua agana, “Iani mamlara da·o court-o dongaha. Uamang jaminna mol·molaniko dakenga, indiba iara court-ni jakosa sorkarini jakode ong·ja. Chinga ia kamrangko ka·enga, aro indakmiting somoio mitam transporter-rang chu·ongnikjaenga, uni gimin golpoe chanchirimanirangko dakenga”.
Uni aganani gita sorkarni gimikni gitan kamrangko ka·enga, jedakode manderang iani bidingo maming neng·nikanirangko chagrongna nangjawa. “Anga manderangko ia obostarangni bidingo jajrengjachina mol·molenga, indiba indakgipa obosta ong·bebegenchimoba Meghalaya sorkari iani bidingo manderangna u·iataniko dakgen,” ine ua agandapaha.
