U·IATTIMGIPAONI
TURA: Batanggimin 2016 bilsio chamatgipa SDRF fund-ni tangka paisarangko jakkalsretanio saksa agriculture official jak donga ine matnanganiko adita salrangna skango joltangni songbat kingsao nakatatgipa mamlako dolsa High Level Committee (HLC)-ko songenba sandirokataniko dakatchina gita Rajabala MLA, Mizanur Rahman Kazi Butbaro aganaha.
Saksa Agriculture official-ni kosako matnangani kattarangko Kazi, Meghalaya Chief Secretary, D P Wahlang-na seatan baksa uni kosako sandirokataniko dakatchina gita nangnikanikoba janapataha.
Indake SDRF-ni fund-rangko tik ong·gija ba kakketgija suale on·anio, Selsella Block-ni ning·o kam ka·enggipa Agriculture Inspector Mominul Islam jak donga ine, A·chik Songbat kingsa Salantini Janera-o, December 12 tariko nakatatahachim, uano matnange segipa official-ni kosako sandirokataniko Kazi nangnik dabiaha.
Songbate indakeba matnange sekua je, man·gnirangko mikkang nitee on·aha, jeon man·na nangchongmotgiparangde man·piljaha aro an·tangni bakdilrangni namgninasan mikkang nitee dakaha, ineba janapahachim.
Unigimin ‘‘a·jolo songdong-a·chagipa manderangni namgnina, dolsa high level committee-ko songenba kraa-bewalo sandiatna nanga, aro dosi donga ine rim·a man·ode department-ni gita ja·ku de·na nanga, jedakode mikkangchi indakgipa obostarang ong·taijawa’’ ine Kazi, uni Chief Secretary-na seatgipa chittio janapata.
Unomitingo, matnangako man·gipa official-ni kosako maiko ja·ku de·engachim, uko an·tangna u·iatrorochina gitaba Rajabala MLA, mol·molataha.
