U·IATTIMGIPAONI
TURA: Election-ni somoirango ku·rachakgiminrangko Conrad Sangmani re·dilgipa MDA sorkarini mamingkoba chu·sokatjani a·sel, Meghalaya a·dok pilakni gitan ja·manchakenga ine Meghalaya Pradesh Youth Congress (MPYC) mijalo matnange aganaha.
“Five Years Plan-ni data-ko NITI AYOG-ni parakatgipao nika je, India gimiko Meghalaya a·dokan ja·manchakbatsranggipa ong·enga, uni ja·mano Bihar aro Jharkhand a·dok ong·skaenga. Medical ba sana-banani a·bakuo ja·manchakan baksa report-o kangal-cha·asianioba bilongbatgipa ong·aniko janapaha. Atchigital bi·sa sakchikkingprako, komibeoba sakdokde siangenga. Sorkari hospital-rang gimikon sana-banani bosturang aro staff-rang chu·ongja. Garo aro Khasi Hills region-rango, nokdang ge 100 prako komibeoba ge 17 nokdangrangode uamangni nokrango rongtalgipa ki·chak-su·buchakanirang dongja” ine NITI AYOG report-ko niate MPYC President, Junebirth C Marak aganaha.
Skang election campaign ka·mitingode, Education-nan uni party ja·skange kam ka·gen ine Chief Minister Conrad Sangma an·tangan ku·rachakachim ine gisik ra·ate aganengon, Meghalayao lekka poraiani gadang namen ja·manchakenga aro poraichakram nokrangko rikani aro skigiparangko rakkianio ugitarang namen ja·manchakenga ine Marak aganaha.
Unomitingo, poraigipa chatro-chatrirangna scholarship-koba on·gija donengani giminba Marak, matnange aganaha.
