U·IATTIMGIPAONI
SHILLONG: A·doko festival-rangko ong·atsimsimenba tangka-paisarangko bon·sretatenga ine matnangtokengon, indakgipa festival-rangko ong·atachi tourists ba songre-songbatgiparangko bang·bate sokbaatna gita dakani ong·a ine A·dokni Tourism Minister Paul Lyngdoh mijalo warachake aganaha.
“Na·a bitchilrangko satengon, joljolde uni bite nanganiko nikjawa, bite nangna gita somoi nanga aroba uarangko nirok-simsakna nanga” ine aganengon, A·dok Sorkari mija Cherry Blossom Festival-na kror 1.95 tangkarangko koros ka·aha, jeon nangdapgipa korosrangkode festival-ko jako ra·giparang, tikitrangchi aroba sponsor-rangchi chu·sokataha ine Lyngdoh aganaha.
Festival-rangko ong·atanina matnanggiparangni kosako warachake aganengon, Nagaland Sorkaride Hornbill festival-ko ong·atna an·tangtangarin kror 5 tangkrangko koros ka·a, jeon Meghalaya Sorkaride kror 1.95-kosan Cherrrry Blossom festival-na koros ka·aia, ine Tourism minister tosusaenba talate aganaha.
Meghalaya-ko indinan damgipin songre-songgabatram biap ine Outlook Magazine-o separakaha ine aganengon, indakgipa festival-rangko ong·ataniarang a·songo ku·rang on·a gitasa ong·a, indake da·ode a·dok gimikon dongchakanirangko am·giparang bang·batroroengaha ine Lyngdoh aganaha.
Jaksi ote matnange ronade altubea, indiba a·doko tourism-ni tang·dobaaninaba kusi ong·skana nanga, a·dokona songrebagiparang lak 15-ona tang·doangaha, uamangoni bang·batan a·song gipinonirang ong·a, Minister aganaha.
A·doko nangchongmotgipa rama-sorok aro chirangko sale on·ani bidingon kam ka·pilgija festival-rangkosa ong·ate tangka-paisarangko galenga ine matnanganirangna aganchakengon, dingtang dingtang department-rangna aro Tourism department-na chamgiminrang donga, una batede badee kam ka·jaenga ine Lyngdoh aganaha.
“ Ia festival-rangko ong·atengon, pilakkon chamgimin budget-rang gitasa ong·atenga, rama-sorokrang, aro chirangko sale on·anio ja·manchakengode, tourism department-ni kam ka·anirangkoba dontongatna nanga inede ong·jaenga, Minister aganaha.
Indakgipa festival-rangko ong·atachin, a·doko bang·a changgipa sapgipa dambe artist-rangko ma·sina gita man·enga, Lyngdoh aganaha.
