U·IATTIMGIPAONI
AMPATI: Meghalaya a·doko computer-rangchi an·seng baljokani kamrangko ka·ani bak gita Meghalaya a·dokni Ayushman Bharat Digital Mission, dingtangmancha ABDM Scan & Share baksana eHospital (NEXTGEN)-ko Ampati Civil Hospital-o a·bachengataha.
Ia NEXTGEN-ko South West Garo Hills a·jani Additional Deputy Commissioner YW Momin, a·bachengate on·angaha aro ia system-ko a·bachengatanio, Ampati Civil Hospital-ni Medical Superintendent Dr Denisha Momin, Meghalaya NIC-ni Scientist Enoch A Sangma, SDM&HO Dr Suparna Hajong, State Program Coordinator Sandy Osmond Khongmawpat, ABDM-ni District Nodal Officer Dr TN Sangma aro gipin official-rangba dongpae bak ra·angtokaha.
Ia system-ko a·bachengatanio ABDM-ni State Program Coordinator Sandy Osmond Khongmawpat-ni dilanichi ABDM-ni official-rang, Scan & Share-ko maikai kam ka·achim, uarangko dake mesokangaha.
Ia tom·anioi NIC-ni Scientist Enoch Sangma, eHospital-ni bidingo agan-talatanirangko on·angskaengon, da·o dipet Meghalaya a·dokni damsni public hospital-rango eHospital facility-ko a·bachengataha aro Garo Hills-oba Ampati Civil Hospital-an Tura Civil Hospital-ni ja·man Scan & Share baksana eHospital (NEXTGEN)-ko ra·gatgipa hospital-rangoni gnigipa ong·enga ine parakataha.
Ia tom·anio, South West Garo Hills a·jani ADC YW Momin-ba jinmana aganprakangengon, a·jao songdongenggipa manderangni namgnina iandakgipa cholrangko ra·gate on·ahani gimin Health department aro ABDM-ko mittelpilangenba, a·jao songdongenggipa manderangna eHospital-ni bidingo ma·siatna gita pilakkon bakrime kam ka·china didiangaha.