U·IATTIMGIPAONI
SHILLONG: Re·baenggipa 2024 bilsini Lok Sabha election-o uni susaani susagijanide ma·mongo BJP-ko dilenggiparangni skaniosa ong·aigen ine a·dokni Cabinet Minister aro BJP-ni dilgipa AL Hek parakataha.
Re·baenggipa bilsini Lok Sabha election-o ua Shillong Parliamentary constituency-oni susana chanchianiko ra·pilengahama ine sing·anina Hek, ia kattarangko aganaha.
Hek-ni parakatani gitade, re·baenggipa bilsini Lok Sabha election-o Shillong aro Tura Lok Sabha seat damgnion me·chik candidate-rangkosa susaatchina gita ua an·tangba an·tangni nangnikaniko parakmanahachim.
“Susana miksonganiko ra·pilani kattade dongja maina chinga namgipa candidate-rangkosa susaatna nangnikenga. Election-o susaa susagijanide ma·mongo BJP-ko dilenggipa manderangni skaniosa ong·aia. Ma·mongni dilgiparang sakoba susachina nangnikode election-o BJP-ko cheatna gita rake kamrangko ka·anian chingni daito ong·aia,” ine Pynthorumkhrah constituency-ni BJP MLA aganaha.
Hek-ni aganani gitade, Meghalaya a·dokni Lok Sabha constituency damgnion me·chik candidate-rangko susaatna man·genchimode BJP-na nambatgen ine adita salrangna skangsan ua aganahachim.
“Parliament-o me·chikrangna 33 percent-ko biap donenggipani bidingo pangchakesa anga iako aganaha,” ine BJP Minister aganaha.
National People’s Party (NPP)-ba Shillong seat-na Ampareen Lyngdoh-ko aro Tura constituency-na Agatha K Sangma-ko candidate dake seokahani gimin BJP-ni gitaba me·chik candidate-rangko susaatna miksonganiara NPP-ko susagrikna miksonganian ong·enga ine sing·anina aganchakaniko on·angskaengon, iano gipin political dolrangko nisan ka·na miksonganirang dongja ine Hek parakataha.
Indake ong·engon, Lok Sabha election-na jabri skangan candidate-rangko parakatchina gitaba ua BJP-ni dilgiparangko didiataha.
“Angni chanchiani gitade, candidate-rangko bon·kamgipa somoio seokgija jabri skangan seokgenba jinmana parakatgenchimode BJP-na aro susaenggipa candidate-rangnaba nambatgen. Iani bidingo anga state president baksa agangrikenba, ta·raken ma·mongni dilgiparangna u·iatchina didigen. Candidate-rangko chinga election-na skangan seokna nanga,” ine Hek aganaha.