U·IATTIMGIPAONI
Bangalore: 2023 bilsini December 14 tarikoni a·bachenge 17 tarikona sal 4-na joljol ong·atgipa ZestFest-o Meghalaya a·dokni Khasi Mandarin Orange bak ra·angengaha. Ia dingtangtegipa event-o Meghalaya-oni Khasi Mandarin komila baksa jatni man·e cha·begipa dakbewal rikbewalrangko aro kamrangko mesokna miksonganiong·a.
Ia event-ko Bengaluru-ni dingtang dingtang songjinmao donggipa dingtangdingtang mall-rang, Lulu Mall, Bangalore, Forum Mall, Kanakpura aro Lal Bagh Botanical Garden-o Meghalaya-o man·e cha·batgipa Khasi Mandarin komilarangko donange mesokangenga jeon local farmer-rang, badingchiwalgiparang aro community-rangko ku·cholsan ong·atna. Ia event-o Meghalaya sorkarini Agriculture aro Farmers’ Welfare department-ni Minister, Dr. Mazel Ampareen Lyngdoh jean mongsonggipa sokgipa ong·e dongpaaha aro pattiangaha. “Ia chol dingtangmancha game ge·e cha·enggiparangna, Farmer Producer Organization (FPO), Self Help Group (SHG-rang) aro Farmer company-rang uamangni game ge·e man·gipa komilarangko Bengaluru-o mesokangna man·e maniangaha,” ine Hon’ble Agriculture Minister agan-talatangaha.
Uamangni jotton ka·e on·kanganina game ge·e cha·enggiparangna namgipa man·dapaniko man·angaha, aro gama ge·eani dal·roroaniko namdapatna technology-o pangchake ranta ka·aniko bilakdapatna aro a·bachengatanio invest ka·na sorkarini pangkamgipa ku·rachakaniko on·manaha. Namnamgipa cholrangko mikkangchina re·mikkangangna na·simangko sengenga jean da·o dambegipa pala simaniko dakenggiparangko anga didia aro sorkari dakchakanirangko on·angkuna on·kangmanaha. Dingtang dingtang scheme-rang donga jekai, FOCUS, CM-ELEVATE, aro PRIME, ia cholko chu·sokataha. Da·alo, an·ching sakantian jatni man·e cha·gipako gipin-rangona gipatna man·enganiko sakki man·aha. Karnataka-oba gipin jatrangni dolrang mesokangenga. Dingtang dingtangni ong·gen-chimoba, jatni ku·cholsan ong·aniko uamangni daka rika bewal gimiko aro an·chingni man·e cha·be-gipa chrok mesaaniko mesokangaha. Ia ku·chol-san ba toksan ong·ani an·chingni nangdime kam ka·enganina aro ma·si-chakanina namen bilakgipa ong·a.
Meghalaya-ni gama ge·anio man·e cha·begipako kan·dike ZestFest-o mesokangaha, a·songtango dal·atgipa ia komilarangni namani aro cha·na toaniko ma·siang-china mesokna miksonge ia festival-ko ong·ataha, gama ge·anio pangchake janggi tangna aro nambat-gipa bosturangko ong·atna a·dok on·kanganiko parakataha. 2023 bilsini December 11 tariko Meghalaya sorkarini Horticulture department aro Meghalaya State Agricultural Marketing Board Dubai-ona GI-tag-o Khasi Mandarin 20 metric tonne-rangko watataha, ia Meghalayua a·dokni gama ge·anio dingtangmancha man·e cha·anina chu·sokaniko man·angaha, ineba janapataha.
Khasi Mandarin komila badingchiwalani a·gilsako jatni dakbewalo ra·chakatna ZestFest cholko on·enga, jeon namnamgipa komilarangko bang·bate ong·katatna man·aniko mesokangan baksa Khasi Mandarin komila aro nangchapgipa bosturangko ong·katatna man·anio gisiko nangbataha. Nina re·baenggiparang jatni chrok mesaanio an·sengangaha, komila ge·ani technique-rangko joljolan dakmesokaniko nikangaha aro dingtang dingtang mesenggipa biterangni gita didianiko man·e dingtangtegipa dakbewalko mesokangaha. Khasi Mandarin komilarangko ZestFest maniangasan ong·ja indiba Meghalaya a·dokni gama ge·anio man·e cha·aniko aro game ge·e cha·giparangni rake kam ka·anirangna on·gilangani ong·a. Ian jatni, gama ge·ani aro manianirangni bibako nitobee gipatani ong·a. Ian Meghalaya-ni gama ge·anikoko tang·doatatnasan ong·ja indiba tourism aro economy-ko bilakatna ong·a, songtangni badingchiwalaniko namdapatna ian on·gipa namgipa chol ong·a.