SHILLONG: A·doko petrol supply ka·anirango neng·nikanirangko man·-ronge manderangni jajrengani, kenchakani ka·o nangani jikjakanirangko nike Meghalaya Sorkari da·o a·dokni je biapoba petrol depot-rangko rikna a·ako ra·na raken niamenga.
Petrol depot-ko rikna sorkari adita somaina sandienga indiba department a·a namako man·jaenga, Food aro Civil Supply-oni koboro aganaha.
“Chinga bang·a biap-rangoniko a·ako ra·na jotton ka·aha indiba da·o chinga rakbate sandienga,” official aganaha
Tanggitik neng·nikani obostarang sokao komi-beoba sal bonga salrangna petrol torangko nanggipa gimikrangna chu·ongna gita chinga nirokangna man·gen sorkari petrol depot-ko rikna nangnikenga.
Meghalaya-ona petrol torangko salbaako mitamko cha·ue palanina uamangni memborrangko rim·ani ja·mano petrol torangko supply ka·na North East Petroleum Mazdoor Union jasaon changgni cham-pengatna ka·mik kenatani ja·mano ua a·sel-mamlako sorkari namen dal·e ra·enga.
Indake ong·engon a·doko mitam petrol pump-rang North East Petroleum Mazdoor Union-ni Meghalaya-ona to supply ka·aniko champengatna ka·mikkenatanirangna ka·oba nangtokpilengaha.
“Uamangni membor-rangko to cha·ue palako rim·aha indiba ua rim·a man·giparangko gimikkon uamangko pattokoniko watna niam gita maming kam ba ja·kurangko de·-gijako ka·gijaan pattoko-niko watako nangnikaha. Uamangni nangnika gita uamangko watkuja,” a·dok-ni mitam petrol pump nokgiparang aganaha.
