U·IATTIMGIPAONI
TURA: Supreme Court-ni adita salrangna skang raiko on·ani ja·man, a·dokni elementary skulrango skigiparangko ra·na sorkarini manchianiko dontongkuchina gita Garo Hills Youth Organisation (GHYO), Shillong-o donggipa School Education & Literacy-ni Director-na aro South West Garo Hills a·jani Sub-Divisional School Education Officer (SDSEO)-na sedoataha.
GHYO-ni u·iatani gitade, 2022 bilsini SLP (C) Nos. 23583-84-o pangchake Supreme Court-ni raiko on·atani ja·man a·dokni dingtang dingtang Government LP aro UP skulrango skigiparangko ra·na tik ka·aniko dontongkuchina gita uamang, School Education & Literacy-ni Director-na aro South West Garo Hills a·jani Sub-Divisional School Education Officer (SDSEO)-na sedoataha aro ia apsan chittikon South West Garo Hills a·jani Deputy Commissioner-naba on·ataha.
“Elementary education-na National Institute of Open Schooling (NIOS)-ni ra·gipa ja 18-ni Diploma in Elementary Education (D.El.ED) ODL course-ara bilsi 2-ni diploma baksa apsan ong·ja ine Supreme Court raiko on·aha aro ia ja 18-ni diploma course-kode kam ka·sogimin skigiparangnasa one-time window dake NIOS on·aha ineba Supreme Court rai on·aha. Uni gimin bilsignini diploma course-de ja 18-ni diploma course baksa apsan ong·ja aro ian niamo ong·jaenga,” ine GHYO-ni president Nazmul Hashan parakataha.
Ja 18-ni D.El.Ed course-ko pass ka·giparangde kam ka·soenggipa skigiparangnasan choliaia ine janapatengon, gital kamo ra·na gitade ja 18-ni D.El.Ed donggiparangko ong·ja indiba bilsignini diploma donggiparangkosa ong·na nanga ine GHYO parakatenba, a·dokni dingtang dingtang LP aro UP skulrango skigiparangko ra·na tik ka·aniko dontongkuchina sorkariko didiataha.
