U·IATTIMGIPAONI
TURA: Garo Hills-o mingsing minggambatsranggipa ‘Rock band’ Riprap dolni ‘Frontman’ Browny R. Marak-na Sonibar salo, Rangsakona constituency-ni MLA Subir Marak, uni kamrangna mittelpilani chin gita gari bolsako boksis dake on·ataha.
Ia gariko Browny-na pakwate on·atna skang Rangsakona-ni MLA, kan·dike jinmana aganprakatengon, Browny Marak saksa indita bilsirangna an·tangni git ring·anichi A·chik jat aro a·songko niksenggipa ong·atahaoba da·alona kingkingan darangba una mande ra·pilskaaniko aro boksisrangko on·a dongkujani gimin ua an·tangan una ia boksisko on·e mande ra·pilskaaniko dakna nangnikaha ine parakataha.
Re·anggipa bilsio, ia bilsini Assembly election-na skang, election-na campaign ka·ani bak gita Riprap concert-ko ong·atani somoio Subir Marak an·tangan Browny Marak-na gariko boksis dake on·na ku·rachakanikoba on·ahachim ine nikna man·a.
Uandaken Sonibar salo, Garobadha-o dingtangmancha concert-ko ong·atani somoio Rangsakona-ni MLA, Riprap dolni lead vocalist Browny Marak-na, gari bolsako boksis dake on·ataha.