U·IATTIMGIPAONI
SHILLONG: Williamnagar-o jekai sorkarini a·arango songdong a·chagipa manderangna a·dok sorkari, a·ani damrangko tik ka·anichi songgigrikahachim, apsan daken Tura jillaoba sorkarini a·arango songdongenggipa manderangna apsan dakgipa cholko on·na miksongenga.
Mongolbar salo, Cabinet tom·a matchotani ja·man kobor ra·timgipa manderang baksa agangrikengon, Tura jillao sorkarini bang·a a·arangon manderang napdrae songdong a·chatokaha aro ia manderangna maming neng·nikanirangko on·gija sorkari, a·ani damrangko tik ka·e on·na miksongenga ine a·dokni Chief Minister Conrad K Sangma parakataha.
Williamnagar-oba apsan daken sorkarini a·arango songdong a·chagipa manderangna sorkari ia cholko on·aha ine janapatengon, Tura-o sorkarini a·arango songdongenggipa manderangni gimin West Garo Hills a·jani Deputy Commissioner, sandirokanirangko dakenba report-ko on·aha ine Chief Minister parakataha.
Tura-o Walbakgre aro civil hospital sambao donggipa sorkarini a·arango manderang songdong a·chatokaha ine janapatengon, je a·arangkon sorkarini nangchongmotgipa kamrangna nangjawachim, uandakgipa a·arango songdongenggipa manderangnade sorkari, a·ani damrangko tik ka·e on·anichi songgigrikaniona ra·bagen ine Chief Minister parakataha.
“Iani bidingo wa·reng baksa report, dongimin somoi aro damrangko tik ka·e sorkarina u·iatchina chinga Deputy Commissioner-ko ge·etmanaha,” ine Sangma aganaha.
Chief Minister-ni aganani gitade, a·arangko on·enga ine aganengon, uan a·arangko sorkari manderangna on·enga ine miksonga ong·ja indiba sorkari, pangkamgipa cholko sandinasa jotton ka·enga.
Williamnagar-o ia songgigrikaniko dakanichi sorkari, bilsio gong kror 2-3-mangni gita kajinarangko man·enga ine janapatengon, Tura-ode sorkari kajinarangko bang·bate man·gen ine Chief Minister parakataha.
