U·IATTIMGIPAONI
TURA: East Garo Hills a·jani badiaba badiaba biaprango licence kingsachin baditaba dam teer counter-rangko kulie paltokenga ine Bristibar salo, A·chik Organisation for Social Welfare (AOSW) matnangatenba, iandake niam gri palgipa teer counter-rangko chipatchina sorkariko didiataha.
AOSW-ni u·iatani gitade, iani bidingo Williamnagar-o donggipa District Taxation Office-o RTI ka·ani ja·man, licence kingsachin baditaba dam teer counter-rangko kulie palenga ine ma·sina man·aha.
Iani bidingo AOSW-ni dilgiparang, Taxation-ni Commissioner Ramakrishna Chitturi-na badi ka·e sedoataha.
“Chingni RTI ka·anina aganchakaniko on·ani gitade, Teer licence donggipa bang·bata manderangan, an·tangtangni licence kingsachi baditaba dam teer counter-rangko kulie paltokskaenga aro ian Gaming Act-ni niamrangko pe·ani ong·engani gimin iandakgipa teer counter-rangko chipna nangchongmota,” ine AOSW-ni dilgiparang, Commissioner of Taxes-na sedoatgipa chittio janapataha.
Licence kingsanchi teer counter-rangko ge·sana bate kulina man·jana gita licence on·ani somoion niamrangko donna gita nangachim ine janapatengon, iandake niam gri licence kingsanchi baditaba dam teer counter-rangko kulie palengani a·selan niam gita teer palenggiparangnade noksan ong·enga aro ian Meghalaya sorkarinaba kajina man·anio noksan ong·enga ine AOSW parakataha.
