U·IATTIMGIPAONI
SHILLONG: Khasi Hills Autonomous District Council (KHADC)-o National People’s Party (NPP)-chi dilenggipa Executive Committee (EC)-na chakpaaniko on·ahani gimin Nongkrem constituency-ni UDP MDC Lambor Malngiang-ni kosako ja·kurangko de·china UDP-ni MDC-rang, UDP-ni dilgiparangko didiataha.
KHADC-o NPP-chi dilenggipa EC-ni ‘namgipa’ kamrangko nikesa ua EC-na chakpaaniko on·eaha ine KHADC-ni Winter Session-ko a·bachengna skang Malngiang, Mongolbar salo parakatahachim ine nikna man·a.
Una skang, UDP-ni saksa ja·delbatgipa dilgipa aro KHADC-o nominate ka·a man·gipa MDC Bindo M Lanong-ba Pyniaid Sing Syiem-chi dilenggipa EC-na chakpaaniko parakatahachim.
NPP-chi dilenggipa EC-na an·tangni chakpaaniko on·engani gimin kobor ra·timgiparangna talataniko on·angengon, Pyniaid Sing Syiem-chi dilenggipa EC-na chakpaaniko on·engoba ua NPP-o napengade ong·ja ine Nongkrem-ni UDP MDC parakatahachim.
“KHADC-ni CEM ong·e jako ra·ani ja·man Pyniaid Sing Syiem, jatni nangchongmotgipa kamrangko aro mongsongbate Clan Bill-ko ra·gatna gisiko nange kamrangko ka·aha. EC-ni iandakgipa kamrangko nikesa manderangni namgnina aro KHADC-ni namgnina kamrangko ka·angkuna gita EC-o chu·onga gita membor-rang dongchina anga an·tangba chakpaaniko on·na nangnikaha,” ine ua aganaha.
Indake ong·engon, uni iandake NPP-chi dilenggipa EC-na chakpaaniko on·ahani gimin Budbar salo UDP-ni MDC-rang tom·e chanchirimangenba, Malngiang-ni kosako ja·kurangko de·china gita UDP-ni dilgiparangko didina tik ka·angaha.
KHADC-o NPP-chi dilenggipa EC-na chakpaaniko on·ahani gimin Nongkrem-ni MDC-ko matnangatengon, “Malngiang-ni iandakgipa ja·kuko de·aniara UDP-kon cha·bokani gita ong·ahani gimin uni kosako nanga gita ja·kurangko de·china chinga UDP-ni president-na sedoatgen,” ine KHADC-o Opposition dolko dilenggipa Titosstarwell Chyne parakataha.