U·IATTIMGIPAONI
SHILLONG: Re·baenggipa 2024 bilsini Lok Sabha election-o Shillong parliamentary seat-na national aro regional party-rangni gisepo susagrikna siengon, sak 500-na batgipa membor-rang donggipa Parliament-o regional party-ni saksan membor-chide national party-rang gita a·dokni dingtang dingtang nanganirangni gimin ku·rang on·pana man·jawa ine Sukrobar salo, Opposition dolni dilgipa aro Congress MLA Ronnie V Lyngdoh parakataha.
Meghalaya a·doko NPP aro VPP gita dakgipa dolrang baksa susana nangengani gimin sing·on, Shillong-ni manderangde seng·giparangsa ong·a aro Meghalaya a·dokode Lok Sabha MP sakgni aro Rajya Sabha MP saksasan dongaia ine Lyngdoh parakataha.
“Sak 500 membor-na bate donggipa Parliament-o regional party-ni saksakamkam membor-kosa seoka ong·ode maikai ua, a·dokni nanganirangko ku·rang on·na man·gen? Uni gimin a·dokni manderang, national party-ni membor-kosa nangnikbattelgen,” ine Lyngdoh aganaha.
Re·baenggipa bilsini Lok Sabha election-o Congress dol, VPP, NPP aro RDA-ni candidate-rang baksa Shillong parliamentary seat-na susagrikna siengachim.
Indake ong·engon, adita salrangna skang Madhya Pradesh, Rajasthan aro Chattisgarh gita dakgipa a·dokrango Congress dolni chu·sokgijani giminba Opposition Congress dolni dilgipa jegalataha aro ia a·dokrangoba Congress dolni vote man·ani skangona bate tang·dobataha ine parakataha.
Ia election-rango tangka paisani gita cholgri ong·gipa Congress dol, tangka paisa bang·gipa BJP dol baksa susana nangaha ineba Lyngdoh aganaha.
