U·IATTIMGIPAONI
SHILLONG: Umiam dolong aro Umiam dam-ni bidingo manderangni gisepo jajrengchakanirang ong·engon, ia Umiam dolong aro Umiam dam damgnikon naljoke rakkina gita sorkari kamrangko ka·enga aro ia dolong aro damna kenna nangani dongja ine Sukrobar salo, Meghalaya Energy Corporation Limited (MeECL)-ni Chairman-cum-Managing Director (CMD) Sanjay Goyal parakataha.
Goyal-ni parakatani gitade, Umiam dolong aro Umiam dam damgnian dingtang dingtang bimangrangsa ong·a aro ia biap damgnikon ru·ute tangbangatna gita sorkari kamrangko ka·engani gimin ia dolong aro dam-na kenchakna nanganirang dongkuja.
Umiam dolong aro Umiam dam-ni bidingo jajrengchakengani gimin talataniko on·angengon, “Umiam dolong aro Umiam dam damgnian naljokani gnang dongenga ine anga na·simangna talataniko on·na ska. Chinga iani bidingo u·i-ma·sigipa manderang baksa bang·en am·sandie nianirangko dakaha aro ia dolong baksana damko ru·uta tangbangatna gita taridapna nanganirangko sorkari taridapenga,” ine MeECL-ni CMD aganaha.
Umiam dolong aro damko taridapengani a·sel manderang re·ruraanirango neng·nikanirangko chagrongna nangtokenga ine an·tangni suk ong·gijaniko parakatengon, ia dolong aro damko taridapanichi ia biap damgnikon komibeoba bilsi 40-50-mangna tangbangdapatgnok ine Goyal aganaha.
“Uni gimin ia kam minggniko chinga ta·raken matchotatna jotton ka·enga aro kamrangko ta·raken matchotnaba chinga ka·dongenga,” ine MeECL-ni CMD aganaha.
