KHARKUTTA: North Garo Hills a·jao aro mongsongbate Kharkutta constituency-ni ning·o donggipa manderangni namgnina Sukrobar salo, Kharkutta-ni MLA Rupert Momin, Meghalaya a·dokni Chief Minister Conrad K Sangma-ni dilanichi aro Community Action through Motivation Program (CAMP)-ni dakchakanichi free health camp-ko Kharkutta-o ong·atangaha.
Ia health camp-ko MLA Rupert Momin an·tangan a·bachengate on·angaha aro ia program-ko ong·atanio, CAMP NE Region-ni project head Kaushik Saikai, North Garo Hills a·jani SDMO Dr NR Marak, doctor-rang, nurse-rang aro jolo songdongenggipa bang·bea manderangba bak ra·angtokaha.
Ia free health camp ba indin sanna banani program-ko ong·atanio, mikron aro be·en bimangni gipin bakrangko porikka ra·e niangan baksana ECG, blood test-rangkoba dake, Mobile medical unit (MMU) aro medical-ni manderang, songni nokni manderangna samrangkoba indin suale on·angaha.
Ia free medical camp-ko ong·atani bidingo CAMP NE Region-ni project head Kaushik Saikai, jinmana talate on·angengon, Meghalaya a·doko CAMP-ni program-ko skanggipa changna ong·atenga aro Meghalaya CM baksana MLA-ni ge·etani gita, uamang ia program-ko Kharkutta-o a·bachengataha ine parakataha.
Ia free medical camp-ko ong·atanio doctor sakgni, Ophtalmic technician saksa, laboratory technician saksa, pharmacist saksa aro nurse-rang, manderangna sanna bananirangko indin on·enga ineba Saikai parakataha.
Ia program-ko ong·atanio Kharkutta-ni MLA Rupert Momin-ba aganprakatengon, Meghalaya a·doko hospital-rang aro dingtang dingtang sanchakgipa biaprang donggenchimoba, chel·gipa songrango dongpagipa manderangde hospital-rangchi re·na chol ong·jani gimin ua iani bidingo Chief Minister Conrad K Sangma baksa agangrike, ia free medical camp-ko Kharkutta-o ong·atna man·aha ine parakataha.
Chief Minister-ni dilanichi ia apsan dakgipa free medical camp-rangko a·dokni dingtang dingtang songrangoba ong·atanggen ineba Momin parakataha.
