U·IATTIMGIPAONI
SHILLONG: Meghalaya a·doko rel garirangko ra·baani bidingo jumang nikchae dongaigija a·doko an·seng baljokani, lekka porani aro kamgri ong·ani kamrangkon namatchengchina gita Sonibar salo, Khasi Students Union (KSU) aro Federation of Khasi, Jaintia & Garo People (FKJGP) dolrang, a·dok sorkariko didiataha.
Sonibar salo, U Kiang Nangbah-ni chang 161-gipa siani salko Shillong-o manianio jinmana aganprakangengon, a·dokona rel garirangko ra·bana skang, a·doko songdongenggipa Tribal manderangna naljokanirangko on·chengchina, sanna banani kamrangko namdapatchina, lekka porani gadangko tang·doatchengchina, songadam nokadamrango manderangni janggi tanganiko namdapatchengchina, game ge·e cha·enggipa manderangni janggi tangani gadangko namdapatchengchina aro kamgri ong·e dongenggipa chadamberangni neng·nikanirangko namatchengchina uamang sorkariko nangnikenga ine KSU-ni president Lambokstar Marngar parakataha.
“Meghalaya a·dokona aro mongsongbate Khasi-Jaintia Hills a·jarangona rel garirangko ra·baani bidingo jumang nikchae dongaigija iandakgipa a·dokni neng·nikanirangkosa namatchengchina chinga nangnikenga. Iandakgipa neng·nikanirangkon sorkari namatna gisiko nangjaenga ong·ode mikkangchi je obostarang ong·genchimoba sorkarian daiko jako ra·na nanggen,” ine KSU president, mikrakataniko on·angaha.
Ia tom·bimonganio FKJGP-ni dilgipa Kitboklang Nongphlang-ba jinmana aganprakangengon, a·doko songdongenggipa Tribal manderangni neng·nikanirangko namatchina gita sorkario dabiangaha.
“U Kiang Nangbah-ni gitoko kagipa buduko badita somoirangna chinga Tribal-rangni gitoko wenjetenganiko nie dongchana nanggen?” ine Nongphlang sing·doangaha.
A·dokona rel garirangko ra·baani bidingo aganna skang, Khasi aro Garo ku·sikrangko Eighth Schedule-o chapatchina dabianiko aro Inner Line Permit (ILP)-na dabianiko chu·sokatchengchina gitaba FKJGP dabiangaha.
Meghalaya a·dokona bostu salgipa rel garirangko ra·baanichi a·dokni manderangan namgni ong·gen ine adita salrangna skangsan UDP-ni dilgiparang, bostu salgipa rel garirangkode ra·chakchina gita dingtang dingtang dolrangko didiatahachim ine nikna man·a.
“An·ching gimikankode jegale dongna man·jawa aro chinga bostu salgipa rel garirangkode nangnikenga. A·doko songdongenggipa manderangna mai nambatgen ukoba an·ching nina gita nanggen maina re·a doani kolrangko namdapatanichi an·ching songni nokni manderangna bading chiwale cha·anio bang·en namgnirangko ra·bana man·gen,” ine UDP-ni general secretary Jemino Mawthoh, a·dokona rel gari ra·baaniko dingtang dingtang dolrangni jegaltokengani gimin aganahachim.