SHILLONG: 2023 bilsina skang, NPP-chi dilgipa MDA sorkarini somoion Meghalaya a·doko koela bikotaniko a·bachengpiltaina man·gnok ine ku·rachakaniko on·ani ja·man ia bilsi gimik koela bikotaniko a·bachengatchipna man·jahani gimin a·dokni Opposition Congress dol, a·dok sorkariko matnangataha.
A·doko koela bikotaniko a·bachengpiltaina ku·rachakaniko MDA 2 sorkari chu·sokatchipna man·kujaenga ine janapatengon, “Anga an·tangba koela bikotani kamrangko ma·sipagipa ong·ani gimin a·doko maikai koelarangko bikottaina man·gen, ukode ma·sienga. Da·o ong·enggipa sorkaride koela bikotaniko a·bachengpiltaina skanian dongjaenga,” ine MPCC-ni president Vincent H Pala parakataha.
Scientific mining lease ba niam gita koela bikotani licence-ko dol 17 koela bikotgipa dolrangna on·ani ong·achim ine janapatengon, “Uamang (sorkari) niam gita koela bikotanio gisik nangjaengani giminsa ia kamo indita somoirangko ra·chae dongenga. Niam gita koelarangko bikotgenchimode tangka paisarang sorkarina re·anggen aro niam gri bikotgenchimode tangkarang gipinrangonasa re·anggen aro ia tangkarangara namen bang·a, jekon uamang election aro gipin kamrangna jakkalenga,” ine Pala aganaha.
Niam gri koela bikotanichin sorkari namgnirangko man·batengani gimin, a·doko niam gita koela bikotaniko a·bachengatchipjawa ineba ua aganaha.
Indita bilsirangni gisepo man·e cha·giparangde man·e cha·batengaha aro kangal ong·giparangde kangal ong·batroroangengaha ine janapatengon, man·e cha·enggiparangara niam gri koela bikotanio jak donggiparang ong·ani gimin koela bikotaniko niam gita ong·atna skani dongjaenga ine MPCC-ni president parakataha.
Meghalaya a·doko maming niam retirangko ra·gatkujaengani giminsa manderang niam gri koelarangko bikotna draatako man·enga ineba ua aganaha.
