SHILLONG: Congress dolko wate Trinamool Congress (TMC)-o napanggipa a·dokni gitcham chief minister Dr Mukul Sangma, Charles Pyngrope aro gipin dilgiparangko Congress dolona rimchaksopiltaina kusi ong·aigen ine Meghalaya Pradesh Congress Committee (MPCC)-ni president aro Shillong-ni Lok Sabha MP Vincent H Pala parakataha.
“Angni bimingko Charles Pyngrope mingatani ja·mansa anga MP ong·aha aro Mukul Sangma baksa apsan kam ka·rimesa anga politician ong·aha. Uni gimin anga uamang sakgnikon gualna man·ja aro uamang sakgnikon anga mande ra·a,” ine Pala aganaha.
Pala-ni aganani gitade, Dr Mukul aro Charles Pyngrope-ko Congress dol ra·gala ong·ja indiba uamang sakgnian an·tangtangsa doltangko wate gipin dolo napangahachim.
Indake ong·genchimoba, gitcham dilgiparangni donanggipa biaprangko gapatna gita Congress dolo manderang bang·en donga ine Pala aganskaaha.
“Chingo chadamberang, skia man·giparang aro ka·dongna man·gipa manderang donga aro uamang da·o dilgipani kamna an·tangtangko tariengaha,” ine ua aganaha.
Congress dol da·o Dr Mukul ba Charles Pyngrope-o pangchakna nangjaha ine janapatengon, uamang party-ona re·bapilgenchimode uamangko rimchaksona uamang kusi ong·skaaigen ine MPCC-ni president parakataha.
Congress dolni opposition dol ong·engmiting somoiosa uamang gipin dolo napangaha ine janapatskaengon, da·oba Congress opposition dolan ong·kuenga aro dingtanganiko nikkujaskalde uamang Congress dolona re·bapilkujanaba gnang ine Pala aganaha.
“Uamang bilna mikbokesa gipin dolo napangahani gimin bilgrigipa dolonade uamang re·bakujanaba gnang,” ine ua aganaha.
Meghalaya a·doko Congress dolko bilakpiltaina gita doloni ong·kate katgipa gitcham membor-rangko doltangona rimbapilna jotton ka·enga ine adita salrangna skangsan, Congress Legislature Party (CLP) aro Opposition dolni dilgipa Ronnie V Lyngdoh-ba parakatahachim ine nikna man·a.
Congress doloni ong·kate katgipa gitcham membor-rang, jemangan doltangona re·bapilna sikengachim, uamang pilakkon Congress dolni dilgiparang rimchaksona kusi ong·aigen ineba Lyngdoh aganaha.
