SHILLONG: Chatro chatrirangni scholarship-rangko on·na gita changni chang ku·rachakanirangko on·ani ja·manba da·onan scholarship-rangko on·kujaengani gimin a·dok sorkariko, NPP-chi dilenggipa MDA sorkario bak ong·paenggipa BJP dolan matnangataha.
“College-rangni nanga korosrangko gamna gitasa scholarship-rangko on·a aro da·o class-rang matchotpilahaoba chatro chatrirang da·onan scholarship-rangko man·skakujaenga. Da·o umbrella scholarship-ba online-o man·engaha aro chatro chatrirangni account-rangko tangka paisarangko chipatna gita pilak nangchongmota lekkarangko a·dokoni ma·mongona watatna nangengahachim,” ine Tura-ni MDC aro BJP-ni state vice president Bernard N Marak parakataha.
Marak-ni parakatani gitade, dingtang dingtang a·selrangko pa·sike a·dok sorkari, mitam chatro chatrirangni bimingrangko ma·mong sorkariona watatjaha aro iani a·sel bang·a chatro chatrirangan scholarship-rangko man·tokjaengachim.
Scholarship-ni tangka paisarangko a·dok sorkari, antignini gisepon watatgnok ine December jaosan a·dokni Education Minister Rakkam A Sangma ku·rachakaniko on·ahachim indiba da·o January ja ong·pilahaoba scholarship-ni maming kobor dongskakujaengachim ine nikna man·a.
Uni iandakgipa ku·rachakanirangni bidingo Education Minister-na gisik ra·atpilaniko on·angengon, “Chatro chatrirang da·o renewal-na dorgasto galani somoi ong·pilengahani gimin chatro chatrirangni gisepo suk ong·gijanirang batroroengaha. Gitcham bilsini scholarship-kon man·kujaenga ong·ode maikai uamang kusi ong·na man·gen?” ine Tura MDC sing·doataha.
2023-24 bilsini scholarship-ko chatro chatrirang man·tokkujaengani gimin Budbar salosan, North Eastern Hill University Students Union (NEHUSU) aro Hynniewtrep Youth Council (HYC) dolrang, sorkarini kosako jegalaniko mesokna gita Shillong songjinmani MBOSE office a·palo jinma jingjengatanirangko dakangenba, Sal 10-ni gisepo chatro chatrirangna scholarship-rangko on·jagenchimode sorkarini kosako bilakbate jingjengatanirangko dakanggen ine mikrakataniko on·angahachim.
