Meghalaya Games 2024-na tarigipa git ‘Here We Play’-ko oprake on·a

Shillong: Ong·nasienggipa Meghalaya Games 2024-na Shillong-ni Summersalt aro Tura-ni NOKPANTE-ni nangrime tarigipa official anthem ‘‘Here We Play’’-ko gitko oprake on·a tariengaha. Anthem English, Khasi, Garo aro Pnar ku·sikrangchi Meghalaya sorkarini kal·susagipa manderangchi ku·cholsan ong·aniko nambatatna niksamsoaniko janape tarigipa git ong·a.
Tura-o tarigimin anthem gitko parakatachi ong·nasienggipa Meghalaya Games ka·oksibatataha. Meghalaya sorkarini Sports aro Youth Affaris Department-na West Garo Hills DC Intiative-ni ning·o a·dok gimikni jatrangko ku·cholsan ong·atna, Meghalaya-ni man·e cha·gipa jatni daka-rikaniko janape anthem ba git ong·a.
“Anthem ‘Here We Go’ ku·cholsan ong·ani gamchatani, ripingani aro Meghalaya-ni manderangni gisiksan ong·aniko janapani ong·a. Stadium-chi, gamchakangchina, an·chingni athlete-rangna uamangni arirangna didiani ong·china aro jemangan bakko ra·a uamang pilaknan pangkamgipa gisik ra·ani aro Meghalaya Games-ko sakki ong·china,” Meghalaya-ni Chief Minister Conrad K Sangma aganaha.
Meghalaya sorkarini Sports aro Youth Affairs-ni minister Shakliar Warjri anthem git-ko oprake on·ao, “Anthem git ku·cholsan ong·ani gisik nangani biba aro an·chingni Meghalaya Games-ni su·uaniko parakani ong·a. Manderangko ku·cholsan ong·aniona ra·banio kal·suaaniko bil gnangatna aro an·chingni pagitcham-ma·gitchamrangoniko man·rikrikbagipa man·e cha·gipa jatni daka-rikanirango rasong chaana Chief Minister-ni niksamsoani ong·a ine aganaha. Anga Summersalt aro NOKPANTE-ko jemangan chadamberangni ka·tongrango nangatnam uamangni changa-sapaniko mesokna uamangko didina ia anthem-ko tariaha,” ua agandapaha.
Gitni kattarangko Summersalt-ni Kit Shangpliang, NOKPANTE-ni Mikhael Marak baksa rake kam ka·ani aro namgipa cholon-bewalni gamchataniko talate tariaha.
‘Here We Play’ gitko Meghalaya Games 2024-o aro gipinrango kal·na aro medal on·anirango watgen. Meghalaya-ni kal·susagiparangna on·kangani ‘Hoikiw’ aro ‘Ahowee’-chi cheani chinko torea
Meghalaya Games-o 19 dingtang dingtang susaani bakrang gimikoni sak 3,000-na baten athlete-rangna ga·timrako on·achi kal·susaani donga.