2024 MP election-o NPP-ni bilko ganggilatgenma?

TURA: Lok Sabha election ong·na da·o ja 4-5 ni gitasan dongaiahaoba, election-na ding·chaoanirang dongan dongkujaenga, unomitingo Turao opposition-ni bak ong·ani a·sel, bilake dongenggipa NPP aro uamangni candidate Agatha Sangma-nan cholrang altubatnaba donggnok.
Tura LS seat-na susaatna gita NPP da·sikkarion da·oni MP Agatha Sangmakon uamangni candidate ong·e susaattaina mingsoaha aro da·sikkari bilsi bon·angachibaraonin campaign-rangkoba a·bachengaha aro election ong·a ong·kuja dipetna ka·angkugen ine ka·dongsoenga. NPP, candidate-tangko cheatna kamrangko ka·chakatengon, gipin party-rangde da·o dipet il·eng-siksak mangba dakbakujaenga.
Congress, AITC, BJP aro gipin political party-rangde sako sako susaatgen, da·o dipet darangba uamangni candidate-rangko biming mingkuja.
Koborrango jangani gitade haida Congress-de Williamnagar-ni gitcham MLA, Deborah C Marak ong·jaode Gambegre MLA, Saleng A Sangma mangoniko saksao susaatnaba donga, maina uamangan party-ni mongsonggipa mikkangrang ong·enga.
A·dokni gitcham chief minister Dr Mukul Sangma aro uko ja·rikgiparangni Congress-oni ong·katgrime All Indita Trinamool Congress (AITC)-o naprimeani ja·man intalan, Congress party na neng·engaha ine nikna man·a.
Re·anggipa 2023 Assembly election-o AITC chu·sokna man·jani gimin, West Bengal-ni party leadership, a·dok election-o susagipa candidate-rangna namedake chakpaaniko on·jaha ine suk ong·gijanirangkoba parakahachim.
Unomitingo Mukul Sangma, jean da·o dipetode AITC-on ong·engkua, BJP baksa agangrikanirangko dakmanaha ong·jaoba gitalgipa regional party-ko bikotnaba donga, jean opposition-rangko bilatkbatatgen.
NPP candidate-ni kosako uamang party candidate-ko susaatgenma susaatjawama ba NPP-ni kosako susaenggipa je party-ni candidate-naba chakaigenma, da·o dipetode jripmittip dongengkua. A·bachengode Rangsakonani gitcham MLA, Zenith Sangma-ko AITC candidate-na mingsamsoa gita dakachim indiba ianaba party dilgiparangni agananiko senge dongenga.
Indake ong·engon, BJP-na, Tura MDC, Bernard Marak-an, an·tangko party candidate-na mingoba mingkujaoba kamrangkode ka·soengaha. Meghalaya BJP-ni gital party president, Rikman Momin, party-ni kam ka·anirangko name nikenga aro mikkang MP election-o BJP-ko Garo Hills-o chadengatna jotton ka·enga.
Indake niksenganirangko indakpile ong·kujaoba, batanggimin 2019-o BJP candidate ong·e susaanio, Rikman nuna chakgiparangko bang·en man·ahachim.
Indakeba nikatna man·a je, Tura LS seat-de skang 1980-rangoni NPP-ni jakkep-on ong·baenga, je seat-kon gitcham Lok Sabha Speaker, PA Sangma sagian jako man·bachengaha.