MSCW chief-ni post-na dorkasto on·china sorkari u·iata

SHILLONG: Meghalaya State Commission for Women (MSCW)-ni chairperson-ni post-o rakkina candidate-rang dorkas-torangko on·china Social Welfare department, public notice-ko on·aha.
Re·anggipa bilsio a·dok sorkarini songako man·-gipa sandigipa committee sak bri candidate-rangko ma·siate on·genchimoba department u·iataniko on·aha.
Re·anggipa bilsini June jaoni Phidalia Toi-ni kam watataonin MSCW chalai-gipa gri ong·enga.
Ua post-na galna sik-gipa candidate-rang antini gisepo uamangni dorkas-torangko on·a nanggen Social Welfare Minister Paul Lyngdoh, Shillong Times songbad-na mija Sukrobar-o aganaha.
Ma·siatgimin sak bri candidate-rangko janape, jemangan qualify ong·a aro post-ko jako ra·na kragipa ong·a gipinrang dongnaba donga indiba sandigipa committee nirokangenga, ua aganaha.
“Commission-ni sko-tongna man·ode nambata mandeko rakkina chingni nangnikani gimin chingna cholrangko on·angkuani ong·gen. Je mandeon namgipa kam bewal donga aro ia gadangni kamko ka·na lekka-porani gadang chu·onga uandakgipa mandeko seokna chinga cholko on·a nangnikaha,” Lyngdoh aganaha.
Sandigipa committee ua post-na jemangna bilko on·aha uamangna agreba sakgipin manderangko department-ni amdapna jotton ka·ani ian skanggipa changna ong·enga, ua aganaha.
“Badita sak manderang uamangni dorkastorangko on·gen chinga uko niang-gen,” ua agandapaha.